Por E.P. | SANTIAGO DE COMPOSTELA | 08/06/2022 | Actualizada ás 13:35
A partir deste sábado, a 'Duendeneta', un orixinal 'music truck' que exerce de cabina de DJ móbil, percorrerá, á inversa, os Camiños de Santiago para levar a música tradicional galega ata os peregrinos que visitan a comunidade. Farao capitaneada por Carlos Crespo, que, por segundo ano consecutivo, sae á estrada con este proxecto para difundir a historia e as raíces da música galega a través das rutas xacobeas.
Nesta nova edición, a furgoneta viaxará ao longo dos meses de xuño e xullo polo Camiño Francés, o Camiño Mozárabe e o Camiño Fisterra-Muxía, ofrecendo ata 32 sesións musicais de carácter didáctico sobre a historia da música galega dos últimos 50 anos.
"Os peregrinos botan unha semana aquí en Galicia, pero apenas teñen oportunidade de escoitar música en galego. Marchan sabendo moito da nosa gastronomía, da nosa historia, da nosa cultura... pero nada da nosa música", destacou Carlos Crespo durante a presentación da iniciativa.
Para liquidar esta situación, esta "cabina itinerante" sairalles " ao paso" aos peregrinos, ofrecéndolles unha sesión didáctica dunha hora e media sobre música galega, que tamén poden gozar os habitantes das localidades polas que pase. Ao concluír, entrégase aos asistentes un folleto cun código QR onde poden descargar unha playlist de catro horas de música galega, que moitos peregrinos empregan na seguinte etapa para camiñar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.