Aprobado o ditame do proxecto de Lei do ciclo integral da auga antes da súa aprobación definitiva no pleno

A Comisión de Ordenación Territorial, Obras Públicas, Medio Ambiente e Servizos deu este xoves luz verde ao ditame do proxecto de Lei de mellora da xestión do ciclo integral da auga, paso co que este novo texto lexislativo queda pendente da súa aprobación definitiva no pleno.

Na sesión, os populares aceptaron 12 emendas dos grupos da oposición --BNG e PSdeG-- e hanse transaccionado outras 14 para un total de 80 artigos que compoñen este texto. Este feito levou tanto aos nacionalistas como aos socialistas a criticar a falta de vontade da Xunta para chegar a acordos sobre a norma.

No debate, conforme sinalou o PPdeG nun comunicado, o deputado popular José Manuel Rey, asegurou que esta lei ofrecerá a todos os galegos "un novo instrumento público 100 por cen para dar un mellor servizo público no ciclo integral da auga".

Así mesmo, destacou que Galicia xa conta cunha Lei de garantía de abastecemento pero que agora se quere "dar un paso máis", "única e exclusivamente para axudar aos concellos que así o desexen voluntariamente pondo á súa disposición un instrumento para que poidan xestionar con maior eficacia e eficiencia o ciclo integral da auga, no que se refire a abastecemento, saneamento e depuración".

Ademais, sostivo que a lei é froito da "demanda constatada" polos concellos de maior colaboración nun tema que é da súa competencia e "froito dun intenso traballo técnico".

CRÍTICAS DO BNG E DO PSDEG

Na sesión, o deputado do BNG Luís Bará ha avanzou que a súa formación non apoiaría o texto ao ter "grandes diferenzas na forma e no fondo". "A principal ten que ver co déficit de participación", sostivo o parlamentario nacionalista, que afeou á Xunta que "interprete" como participación os trámites aos que está obrigada.

Así mesmo, criticou que non se fixese un esforzo por chegar a un pacto galego pola auga, "un ben cada vez máis escaso". "Non se ten en conta ao municipalismo galego, non se tivo en conta o ditame do CES, non se ten en conta o previsto no pacto local da auga", censurou.

"Esta lei ten dous obxectivos principais, un recadatorio, por iso falamos de sablazo da auga; e outro coercitivo, de impor pola forza", sostivo Bará, que criticou tamén que se "laminasen" a maior parte das emendas formuladas polo seu grupo.

Pola súa banda, a deputada socialista Begoña Rodríguez Rumbo, cuxo grupo tamén votou en contra do informe, insistiu no que o proxecto da Lei do ciclo integral da auga debería ser "un acordo de país" para protexer un ben esencial. Con todo, lamentou que o Goberno galego presentase esta normativa sen chegar a consensos cos principais actores implicados na súa xestión que, segundo indicou, son os concellos.

Nesta liña, criticou que non se incorporase ao texto ningunha das alegacións presentadas ao texto pola Federación Galega de Municipios e Provincias (Fegamp), polas deputacións provinciais ou polos propios municipios. "Pídenlles que paguen, pero non lles deixan ter voz", censurou.

OUTRAS INICIATIVAS APROBADAS

Por outra banda, na sesión foi aprobada unha proposición non de lei defendida polo deputado popular Borja Verea pola que a Cámara insta á Xunta a priorizar os investimentos da súa estratexia para a implantación de senllas peonís e ciclistas na área metropolitana de Santiago e, concretamente, a vía que conecta O Milladoiro e Santiago de Compostela. A iniciativa contou cos votos a favor do BNG e a abstención do PSdeG.

Parlamento