Rueda reclama a xestión da AP-9 e competencias na costa sen considerar "prioritaria" a reforma do Estatuto
O presidente da Xunta di coincidir coa postura de PSdeG e BNG para reclamar máis competencias, "hai que ser ambiciosos".
Por Europa Press / Redacción | SANTIAGO DE COMPOSTELA | 09/06/2022 | Actualizada ás 16:56
O presidente da Xunta, Alfonso Rueda, non considera "unha prioridade" acometer unha reforma do Estatuto de Autonomía de Galicia como lle expuxeron o luns en senllas reunións a portavoz nacional do BNG, Ana Pontón, e o secretario xeral do PSdeG, Valentín González Formoso, para que a Comunidade asuma maiores competencias.
Preguntado respecto diso este xoves, na rolda de prensa tras a reunión do Consello, Rueda dixo coincidir coa oposición en que "hai que ser ambiciosos" coas transferencias de competencias.
"Pero tamén hai que priorizar", apostilou, lembrando que agora mesmo hai "encima da mesa" o traspaso da titularidade da AP-9 --cunha lei en tramitación nas Cortes Xerais-- e unha reclamación por parte da Xunta das competencias sobre o dominio público marítimo-terrestre, que é de titularidade estatal.
"Isto pódese facer xa", recalcou o mandatario galego, á vez que insistiu en que "abrir a man a reformar o Estatuto é darlle a razón ao Goberno", que alega que esta modificación é unha condición para que a Xunta asuma as competencias sobre o litoral.
"Co programa que estamos a encarar e coas frontes que agora temos abertos ou estamos a traballar, sen negar iso absolutamente, a día de hoxe teño que dicir que non o considero unha prioridade fronte a outras cousas que hai que atender e dedicarlle moitas horas, moitos esforzos e moitos consensos", explicou Rueda.
