O BNG critica que o novo mapa do autobús do Goberno suprime liñas en 23 concellos

O BNG reclamou á ministra de Transportes, Raquel Sánchez, que explique as razóns detrás do plan do Goberno que suporía a eliminación de paradas de autobús en 23 localidades e concellos galegos, unha idea que a formación frontista pide que se rectifique para garantir os dereitos dos 136.000 persoas afectadas.

O deputado do Bloque no Congreso Néstor Rego rexistrou unha solicitude para que a ministra do ramo compareza na Cámara baixa e ofreza explicacións sobre a proposta, que considera que prexudica a veciñanza do rural e promociona o uso do vehículo particular.

A formación frontista demanda a revisión do novo mapa concesional das liñas de autobús de competencia estatal, que carrexa "menos paradas e rutas", o que para o Bloque é "un recorte de servizos" que atende a criterios económicos e de rendibilidade.

"No novo mapa presentado, de non rectificar a súa decisión, desaparecerán as paradas de 23 vilas e concellos en Galicia nos percorridos interautonómicos", denunciou o deputado do BNG, que puxo o acento en que o plan "só inclúe unha nova parada, en Sanxenxo, pero só para a súa conexión con Madrid".

Así as cousas, solicita a Raquel Sánchez que compareza na Comisión de Transportes, Mobilidade e Axenda Urbana para explicar as razóns detrás da reconfiguración do plan cuxa paralización será demandada polo BNG, como avanzou Rego.

"O deseño da mobilidade non pode rexerse unicamente por criterios de rendabilidade económica e decidir así a supresión de paradas de autobús, senón que debe primar o ben común e asegurar servizos públicos aos habitantes" conclúe o deputado nacionalista.

O deputado do BNG no Congreso, Néstor Rego, intervén durante unha sesión plenaria no Congreso dos Deputados, a 9 de xuño de 2022, en Madrid (España). O pleno vira ao redor da votación do proxecto de lei de impulso aos plans de pensione. Alberto Ortega - Europa Press | Fonte: Europa Press