Continúan ingresados os tres traballadores feridos polo derrube do escenario do Son do Camiño, un deles en UCI
Por Europa Press / Redacción | SANTIAGO DE COMPOSTELA | 12/06/2022 | Actualizada ás 12:34
Continúan hospitalizados no Clínico de Santiago tres traballadores feridos polo derrube do escenario principal do festival O Son do Camiño, que se produciu este venres sobre as 13,00 horas, durante as tarefas de montaxe no compostelán Monte do Gozo.
Segundo confirmaron fontes autonómicas a Europa Press, non se produciron cambios no prognóstico dos ingresados nas últimas horas. O operario en UCI, con prognóstico grave, mantense estable; mentres os outros dous pacientes están en planta "recuperándose". Os outros tres feridos xa foron dados de alta.
Este sábado o director xeral de Emerxencias e Interior, Santiago Villanueva, sinalaba que o traballador que se atopa en estado grave "aparentemente caeu desde arriba", mentres que os outros tiveron lesións tras caerlles enrriba o escenario.
En canto ás causas do accidente laboral, o director xeral pediu esperar aos informes de Inspección de Traballo e do Instituto Galego de Seguridade e Saúde Laboral (Issga), así como do informe da Policía Nacional, que xa foron trasladados ao xuíz.
