Por E.P. | SANTIAGO DE COMPOSTELA | 14/06/2022 | Actualizada ás 12:29
O secretario xeral do PSdeG, Valentín González Formoso, reclamou á Xunta "políticas activas" para paliar o "deserto industrial" no que se está convertendo Galicia, cuxo índice de produción industrial (IPI) caeu un 6,5% no primeiro cuadrimestre de 2022, mentres que en toda España subiu un 2%.
En declaracións aos medios antes de manter un encontro este martes con empresariado do polígono de Carballo, o líder socialista esgrimiu que os indicadores son "preocupantes", ao que sumou que "se perderon 60.000 empregos". "Desde o 2009, Galicia perdeu máis de 100.000 postos de traballo e no conxunto do Estado, en cambio, recuperouse máis dun millón de empregos", asegurou Formoso.
Neste contexto, o secretario xeral do PSdeG insistiu en que o sector "require de políticas activas, reindustrializadoras, de liñas de apoio a emprendedores e ao tecido industrial consolidado e exportador", que "cada día" busca "o seu espazo na economía non só galega e nacional, senón tamén na europea".
RENOVAR O POLÍGONO DE CARBALLO
Esta visita, segundo explicou Formoso, foi solicitada polas empresas de Carballo para "dar a coñecer as necesidades e a realidade do tecido produtivo" da comarca de Bergantiños. Así, o líder socialista puxo o foco en que o polígono, que "xa ten a súa idade", require unha ampliación que a Xunta "debería estar xa cometendo". En concreto, reclamou actualizacións en materia de telecomunicacións e infraestruturas.
Non en balde, o tamén presidente da Deputación da Coruña demandou a implicación das "distintas administracións" a través das estradas da súa titularidade, "tamén" do goberno provincial que el mesmo dirixe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.