Sanidade, disposta a negociar o aumento salarial ao persoal que prolongue a súa xornada laboral

O conselleiro de Sanidade, Julio García Comesaña, sinalou que ante a demanda dos sindicatos que reclaman 12.000 euros anuais --mil ao mes-- como complemento salarial ao persoal médico de Atención Primaria que prolongue a súa xornada laboral nun centro de saúde con algunha praza vacante de médico sen cubrir, a Xunta está disposta a negociar os 10.000 euros ao ano que ofreceu o Servizo Galego de Saúde (Sergas) na Mesa Sectorial celebrada esta semana.

"Estamos abertos a axustar ese recoñecemento nos termos que os representantes legais dos traballadores nos suxiran e nós podamos abordar", indicou Comesaña a preguntas dos medios na Coruña, á vez que insistiu en que se trata dun recoñecemento "máis que merecido". "Trataremos de chegar a un acordo como en calquera negociación", apostilou.

Así, en respostas aos medios antes da inauguración do I Congreso Galego de Formación Sanitaria Especializada, Comesaña destacou o "enorme papel" que levan facendo os profesionais de Atención Primaria "todos os veráns durante moitos anos".

O pasado martes no marco da Mesa Sectorial, o Sergas ofreceu aos sindicatos por prolongación de xornada programada nun centro de saúde con algunha praza vacante de médico sen cubrir, que supón catro horas e media á semana máis, 10.000 euros ao ano, mentres que as centrais reivindican mil euros ao mes brutos para que se teñan en conta as vacacións (12.000 euros anuais).

O conselleiro de Sanidade, Julio García Comesaña, inaugura un novo centro de rehabilitación psicosocial en Ponteareas.. XUNTA