Preto de 23.000 persoas concorren este fin de semana ás oposicións de educación
Repartiranse polas 145 sedes habilitadas pola Xunta, en 14 localidades de toda Galicia.
Por Europa Press / Redacción | SANTIAGO DE COMPOSTELA | 17/06/2022 | Actualizada ás 13:53
Preto de 23.000 persoas concorrerán este sábado e domingo ás oposicións de educación nas 145 sedes habilitadas pola Xunta, en 14 localidades de toda Galicia. En concreto, as probas para o corpo de docentes comezarán este sábado 18 de xuño, mentres que para o resto --inspectores, profesorado de ensino secundario, escolas oficiais de idiomas e artes plásticas e deseño-- será o domingo 19. Todas elas optarán ás 2.484 prazas.
Ás 145 sedes --60 na provincia da Coruña, 15 na de Lugo, 19 na de Ourense e 51 na de Pontevedra-- serán na súa totalidade centros educativos, ben sexan colexios, institutos, centros integrados de FP ou centros universitarios. Concretamente, estarán situadas na cidade da Coruña, Culleredo, Ferrol, Narón, Santiago de Compostela, Lugo, Monforte de Lemos, Ourense, O Carballiño, Pontevedra, Marín, Lalín, Vigo e en Vilagarcía de Arousa.
ÁS 9 DA MAÑÁ
Con carácter xeral, a hora de presentación para os 222 tribunais serán as 9 da mañá, salvo excepcións puntuais, e a primeira proba desenvolverase ás 11 horas. Toda a información está dispoñible no Portal Educativo. A Xunta lembra que, en virtude do acordo asinado coas organizacións sindicais, as persoas interinas e substitutas non estarán obrigadas a presentarse ao procedemento.
Estas prazas súmanse á oferta de emprego público de estabilización, que elevan ás 4.000 as prazas no ensino que se convocarán este ano, seguindo o camiño de máis de 13.000 prazas ofertadas polo Goberno galego nos últimos anos neste campo, unha clara aposta por mellorar as condicións de traballo do persoal docente.
FINALIZAR 2023
A Xunta prevé finalizar estes procesos en 2023, cunha taxa de interinidade docente do 6 por cento no conxunto de prazas. Isto supón dous puntos menos do 8 por cento que esixe o Goberno central para finais de 2024, obxectivo que Galicia "xa cumpre", destaca o Executivo autonómico. A media estatal é do 25 por cento.
Adicionalmente, sumaranse as prazas do extinto corpo de profesores de FP. O Goberno autonómico xa aprobou a Oferta Público de Emprego (OPE) para estas prazas, pero non se poderán convocar ata que o Ministerio de Educación desenvolva a nova lei de Formación Profesional.
