Por E.P. | SANTIAGO DE COMPOSTELA | 17/06/2022 | Actualizada ás 17:47
A portavoz nacional do BNG, Ana Pontón, propón axudas directas aos traballadores autónomos para paliar os efectos da subida de prezos, xa que, advirte, é un dos colectivos "máis impactados" pola escalada inflacionista. Ademais, lembra que o 70 por cento das 210.000 persoas que están nesta categoría laboral teñen rendas inferiores ao salario mínimo interprofesional.
Pontón reuniuse este venres coa dirección da Unión de profesionais e traballadores autónomos (UPTA), encabezada por Eduardo Abad e Jesús Diéguez, co fin de abordar a súa situación nun momento en que se están ultimando reformas lexislativas para un colectivo "con moitas dificultades, a pesar do seu pulo e importancia" e que, por iso, precisan un "apoio por parte das administracións públicas".
Ademais das axudas directas, que Pontón inclúe dentro do plan d choque de 700 millóns de que o BNG propón mobilizar, tamén incorpora prestar apoio no proceso de transformación e dixitalización que esixe o momento. Outro dos asuntos tratado no encontro, ao que tamén asistiu Daniel Pérez, foi a reforma estatal que se debate neste momento e, en concreto, os tramos de cotización.
"Pensamos que é importante abordar un sistema que achegue maior equidade para as persoas autónomas e fixar tramos é un camiño acertado, pero para facer unha valoración hai que esperar a ver o resultado final da negociación en curso, como se concretan os tramos e cales serán as contraprestacións para un colectivo tan de gran importancia económica e social", explicou.
PENSIÓNS MÁIS BAIXAS
Pontón incidiu en que a maioría de persoas autónomas en Galicia teñen pensións "moi baixas", as segundas "máis reducidas" do Estado. Así, a líder nacionalista tamén insistiu ao Goberno de Rueda nun plan de choque que "mobilice 700 millóns de euros", con axudas directas para os colectivos con menos niveis de renda e para os sectores económicos máis impactados polo IPC, entre eles os que traballan por conta propia.
"Un plan que inclúa unha liña de axudas directas para este sector que está a soportar como poucos a escalada de prezos", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.