A Deputación da Coruña desenvolverá un plan estratéxico do deporte da provincia
a Deputación da Coruña iluminarase de verde para visibilizar a Esclerose Lateral Amiotrófica no Día Mundial desta doenza.
Por E.P. | A CORUÑA | 20/06/2022 | Actualizada ás 18:07
A Deputación da Coruña desenvolverá, coa colaboración da Asociación Galega de Xestión Deportiva (Agaxede), un plan estratéxico do deporte da provincia, que incluirá, nunha primeira fase, a elaboración dunha diagnose do estado actual do deporte coruñés e o desenvolvemento de accións formativas de cara á profesionalización da xestión das entidades e a súa dixitalización.
Así o anunciou este luns o presidente da Deputación, Valentín González Formoso, tras a reunión de traballo que mantivo co seu homólogo de Agaxede, Eduardo Blanco Pereira, co que abordou a necesidade de comezar realizando un estudo para coñecer a situación actual do ecosistema deportivo no ámbito da provincia.
Ao mesmo tempo, tendo como base as conclusións desa diagnose, a Deputación e Agaxede ofrecerán accións de formación presenciais e en liña aos xestores das entidades. Tamén estudan a posta en marcha do proxecto 'Natural Gym', destinado á creación de infraestruturas ao aire libre en áreas lindeiras con parques públicos e outros espazos naturais para a práctica libre de actividades deportivas.
OUTRAS INICIATIVAS
Por outra banda, a Deputación da Coruña iluminarase de verde, sumándose á campaña '#LuzPolaELA' que promove a Asociación Galega de Esclerose Lateral Amiotrófica no Día Mundial desta doenza, que se conmemora mañá, día 21.
Xa no ámbito cultural, a megalítica da Costa da Morte protagoniza o mural que os artistas urbanos Mou e Sokram do estudo Mutante Creativo están a realizar no exterior dun centro social na cidade de Málaga. Trátase dunha acción paralela que promove a área de Turismo da Deputación da Coruña, no programa do CM Málaga Cities & Museums International Tradeo Fair.
Mentres, segundo informa o organismo provincial, o Teatro Colón acollerá, un ano máis, o 'Xullo Pop', un ciclo que contará o venres 1, con Anxo Araújo; o sábado 2, con Garza; e domingo 3, con Grampoder. As entradas, gratuítas, xa se poden retirar na páxina web do Colón.
