Galicia sitúase como referencia no Estado en bandeiras azuis
Rueda augura "moitas alegrías turísticas".
Por E.P. | SANTIAGO DE COMPOSTELA | 22/06/2022 | Actualizada ás 18:13
Marín acolleu este mércores o acto de entrega das 166 bandeiras azuis que este verán ondearán en 112 praias, 11 portos deportivos, 29 sendeiros e 14 centros ambientais de Galicia, "un recoñecemento á súa aposta polo turismo sustentable", e que sitúa Galicia como referencia en España en bandeiras azuis.
O presidente da Xunta, Alfonso Rueda, destacou que son 11 estandartes máis que o ano anterior, que ondearán ao longo de 43 quilómetros de costa. Rueda sinalou que "non é sinxelo obter unha destas bandeiras ou mantelas", xa que os criterios ambientais para a súa concesión "son moi esixentes". Por iso, destacou o mérito que supón que Galicia teña unha de cada cinco bandeiras concedidas en España.
O titular do Goberno galego, que estivo acompañado pola conselleira de Medio Ambiente, Ángeles Vázquez, agradeceu a contribución de visitantes, veciñanza, profesionais do mar e, especialmente, dos municipios neste "éxito ambiental" que tamén demostra --dixo-- a "excelencia" deste litoral e de "todo o bo" de Galicia para ofrecer nun verán que, segundo reiterou, será "excepcional".
"MOITO TRABALLO POLA SUSTENTABILIDADE"
Pola súa banda, o presidente da entidade que concede estes distintivos, a Asociación de Educación Ambiental e do Consumidor (ADEAC), José Palacios, defendeu que para obter unha bandeira azul "non hai secretos" máis aló de "moito traballo pola sustentabilidade, a calidade dos servizos e a seguridade".
José Palacios tamén saíu ao paso das críticas que reciben estes distintivos ambientais e asegurou que sempre proceden daqueles "que non as poden conseguir, que non se presentan ou que non demostran que cumpren con criterios que son consensuados internacionalmente".
SANXENXO
Un ano máis, Sanxenxo volveu ter un especial protagonismo neste acto de entrega das bandeiras azuis ao recoller 17 distintivos para as súas praias e outros tres para os seus portos deportivos, que se suman ás xa recollidas en Madrid para os seus sendeiros e centros ambientais. Sanxenxo é o municipio de España con máis bandeiras azuis nos seus areais e aspira a incrementar o número de insignias.
A alcaldesa de Marín, María Ramallo, expresou a súa alegría porque o seu municipio fose o elixido para acoller este acto de entrega deste "sinal de calidade" que supón recoñecer que hai "moito traballo detrás para chegar a este momento".
"MOITAS ALEGRÍAS TURÍSTICAS"
"Cruzando os dedos e esperando que o tempo acompañe un pouquiño máis", Rueda asegurou que, desde un punto de vista turístico, as cousas van "moi ben" e hai "moi boas perspectivas". "As expectativas son fantásticas", sentenciou, antes de aludir á recuperación do turismo internacional e de exemplificalo co Camiño de Santiago, cun 60% de peregrinos estranxeiros cando "o ano pasado houbo moitos menos".
Rueda considera que "se traballou moi ben" e sinalou que, dado o "tesouro" de paisaxes, gastronomía e hostalaríade Galicia, se se continúa "con sentidiño", a Xunta ten claro que Galicia vai levar "moitas alegrías turísticas" neste verán e no futuro.
