Admitidas 1.261 persoas no proceso do Sergas para cubrir 94 prazas de funcionariado

Un total de 1.261 aspirantes resultaron admitidos para cubrir 94 prazas de funcionario sanitario da escala de saúde pública e administración sanitaria do Servizo Galego de Saúde (Sergas).

Así o informou nun comunicado de prensa a Consellería de Sanidade, que indica que o Diario Oficial de Galicia deste xoves publica o anuncio polo que se dá publicidade á relación definitiva de persoas admitidas e excluídas, así como ás exentas e non exentas do exercicio de lingua galega, nas probas selectivas para o acceso a diversas clases de persoal funcionario sanitario da escala de saúde pública e administración sanitaria.

Do número total de prazas (94), un total de 18 corresponden á categoría de persoal farmacéutico inspector de saúde pública; 19 a inspector médico; cinco a inspector farmacéutico; cinco a licenciado en Ciencias Químicas; tres a licenciadas en Ciencias Biolóxicas; seis a licenciado en Farmacia; 19 a licenciadas en Medicina e Cirurxía; dous a licenciado en Psicoloxía; 11 a ATS/DUE; e seis a subinspector sanitario.

Das 1.261 persoas aspirantes, 253 optan ás prazas de inspector farmacéutico de saúde pública; 149 á de inspector farmacéutico; 64 a inspector médico; 163 ás de licenciado en Farmacia, 81 ás de licenciado en Medicina e Cirurxía e 241 ás de ATS/DUE, mentres que 138 corresponden a subinspector sanitario.

Sanidade puntualiza que resultaron excluídos o 3,5 por cento dos profesionais inscritos. Ademais, resalta que o 96% das inscricións para este proceso se formalizaron por persoas residentes en concellos de Galicia e o 52% das persoas admitidas teñen menos de 40 anos e case o 82% son mulleres.

Do total de aspirantes admitidos, 1.232 participan pola quenda de acceso libre, catro na de promoción interna e 25 pola de discapacidade xeral.

Persoal do Sergas.. XUNTA - Arquivo