Por Europa Press / Redacción | Madrid | 23/06/2022 | Actualizada ás 20:23
USO e Sitcpla advertiron a Ryanair de que está a incumprir "de forma manifesta" o decreto de servizos mínimos emitido polo Ministerio de Transportes, Mobilidade e Axenda Urbana para a folga de tres días que dá comezo a medianoite do 24 de xuño, xa que a aeroliña quere operar o 100% dos voos programados.
Así llo fixeron saber mediante un certimail, un correo electrónico certificado con validez dixital. Os sindicatos recibiron esta tarde a listaxe de voos que Ryanair considera protexidos polo decreto e en virtude do cal citará os traballadores a cumprir cos servizos mínimos. Segundo sinalan os sindicatos tras comprobalo cos seus servizos xurídicos, a aeroliña prevé operar o 100% dos voos.
"Ryanair está a enviarnos unha orde ilegal, que contravén de forma manifesta o decreto de mínimos de Transportes, que xa de seu era abusivo", indicou a secretaria xeral de USO en Ryanair, Lida Arasanz, quen incidiu en que os traballadores están "ante a mesma desprotección que hai catro anos".
Pola súa banda, o delegado de Sitcpla en Ryanair, Manuel Lodeiro, remarcou que os traballadores se senten "completamente traizoados polo Estado de dereito". "Ningún organismo protexe os nosos dereitos fundamentais, pero si o negocio da empresa que máis burla a lexislación nacional", apostilou.
O Ministerio de Transportes, Mobilidade e Axenda Urbana (Mitma) comunicou que a folga de Tripulantes de Cabina de Pasaxeiros (TCP) de Ryanair de seis días afectará a 2.649 operacións e a preto de 440.000 pasaxeiros en dez aeroportos españois, polo que fixou servizos mínimos que poden alcanzar nalgúns casos ata o 82% dos voos programados.
A folga está convocada para os próximos 24, 25, 26 e 30 de xuño e 1 e 2 de xullo, nas dez bases da aeroliña no Estado español: Madrid, Málaga, Sevilla, Alacante, Valencia, Barcelona, Xirona, Santiago de Compostela, Eivissa e Palma de Mallorca.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.