Por E.P. | SANTIAGO DE COMPOSTELA | 27/06/2022 | Actualizada ás 17:23
A Xunta de Galicia estende o próximo curso o modelo de ensino plurilingüe aos ensinos profesionais de artes plásticas e deseño que se imparten nas Escolas Superiores de Arte e Deseño en Galicia.
A Consellería de Cultura, Educación, FP e Universidades abriu o prazo para que os catro centros públicos que imparten estes ensinos en Galicia (Pablo Picasso na Coruña, Ramón Falcón en Lugo, Mestre Mateo en Santiago e Antonio Faílde en Ourense) poidan acollerse a esta nova liña que completa o modelo plurilingüe xa implantado nas etapas de Infantil, Primaria, ESO, Bacharelato e Formación Profesional.
Tal e como publica o Diario Oficial de Galicia, o prazo estará aberto ata o 14 de xullo. As Escolas de Arte e Superiores de Deseño interesadas en acollerse a esta medida o próximo curso deberán comprometerse a desenvolver os ciclos formativos plurilingües polo menos durante dous anos, de tal maneira que o alumnado que se incorpore en primeiro curso poida completar os dous cursos do ciclo formativo.
Con esta medida dáse cumprimento a un dos obxectivos recollidos na Estratexia Galega de Linguas Estranxeiras, Edulingüe 2030, que inclúe entre os seus obxectivos estender o plurilingüismo aos ensinos de réxime especial.
Esta Estratexia, dotada con 83 millóns de euros para a súa primeira fase de implantación de catro anos, ata 2025, está enfocada a consolidar e ampliar os programas de éxito desenvolvidos na última década e impulsar accións de alto impacto e especialización vinculados á inclusión, a innovación e a internacionalización.
O modelo plurilingüe, que arrincou en Galicia no curso 2010-11 coa impartición de ata un terzo do horario lectivo nunha lingua estranxeira en 58 centros, hoxe está implantado en 465, conta 628 auxiliares de conversación e chega a 100.000 estudantes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.