Sanidade ten pendente "resolver" o futuro do Hospital Provincial de Pontevedra cando funcione o Gran Montecelo
Comesaña aclara que "as necesidades funcionais que nese momento se expoñan" os levarán "a considerar ese uso sanitario ou non".
Por E.P. | SANTIAGO DE COMPOSTELA | 28/06/2022 | Actualizada ás 17:19
O conselleiro de Sanidade, Julio García Comesaña, admitiu este martes que o futuro do Hospital Provincial "é un tema" que teñen "que resolver", xa que aínda non está decidido se manterá o uso sanitario unha vez que entre en funcionamento o Gran Montecelo. Comesaña fixo estas declaracións durante a inauguración este martes da exposición sobre os 125 anos de historia do Hospital Provincial na cidade do Lérez.
O titular de Sanidade indicou que terán "que abordar tamén máis pronto que tarde o seguinte paso, que é a remodelación da parte vella do hospital". "Nese camiño seguro que acordamos entre todos a mellor opción para este edificio, que de momento non está pechada", sostivo.
NECESIDADE
A decisión que se adopte "dependerá das circunstancias", puntualizou, de modo que "as necesidades funcionais que nese momento se expoñan" os levarán "a considerar ese uso sanitario ou non", apostilou.
En todo caso, lembrou que "ao que se tende é a concentrar" e, neste sentido, citou as experiencias de Vigo ou Lugo para apuntar que "cada vez a medicina é moito máis multidisciplinar".
