Aprazado ao luns o pleno do Concello de Santiago por tres casos de Covid en concelleiros e ausencia doutros
Por Europa Press / Redacción | SANTIAGO DE COMPOSTELA | 29/06/2022 | Actualizada ás 12:28
O pleno ordinario previsto para este xoves no Concello de Santiago foi aprazado á próxima semana ao haber tres concelleiros con positivo confirmado por Covid-19, outro de baixa por motivos médicos e falta por cuestións persoais polo menos outra edila.
Así o confirmaron diferentes fontes municipais a Europa Press, que indicaron que por parte do grupo de goberno atópanse en casa, "ben" e en modo de traballo telemático as concelleiras Mercedes Rosón, de Urbanismo, Vivenda, Cidade Histórica e Acción Cultural e primeira tenente de alcalde, e Marta Abal, titular de Economía, Facenda, Persoal, Contratación e Modernización da Administración Local.
Por parte do grupo municipal Compostela Aberta confirmaron que o edil Xan Duro atópase con Covid-19. No seu caso tamén fontes da súa formación apuntaron que está "ben, con síntomas".
E por parte do grupo municipal do Partido Popular informaron de que un dos seus concelleiros atópase de baixa médica por enfermidade e outro presenta síntomas de Covid, pero deu negativo na proba de momento. Debido ás ausencias, á que se suma unha dunha concelleira do grupo de goberno por outros motivos persoais, o pleno municipal ordinario foi aprazado ao próximo luns.
