Galicia presenta un gran perte da cultura: 400 millóns dos Next Generation para 19 proxectos
Rueda crítica a "ausencia de iniciativa" do Goberno central para pór en marcha un perte no ámbito da cultura
Por Europa Press / Redacción | SANTIAGO DE COMPOSTELA | 30/06/2022 | Actualizada ás 14:12
A Xunta de Galicia aspira a captar uns 400 millóns de euros a través de 19 proxectos acordados entre o Goberno galego e 120 entidades do sector da cultura para optar aos fondos Next Generation."O que queremos é facer actividade ante a non actividade do Goberno central en materia cultural", dixo o seu presidente.
Na rolda de prensa posterior á reunión do Consello da Xunta, o máximo mandatario autonómico, Alfonso Rueda, destacou que o seu Executivo pretende "ter todo preparado e gañar tempo" para cando se fagan as convocatorias, co convencemento de que o sector cultural "non pode quedar fóra dos fondos Next Generation". Por iso, as aspiracións galegas están en acadar non menos do 15% do orzamento europeo para estas accións.
"Do mesmo xeito que hai pertes noutros ámbitos, é necesario que haxa un perte orientado a todo o que ten que ver coas industrias culturais", sostivo Rueda, que considerou que, de non habelo, deberíase apostar por unha "descentralización" e asignar a cada comunidade autónoma unhas cantidades para que, "cumprindo todas as normativas, se poida facer un perte descentralizado".
Neste contexto e co obxectivo de "facer forza nos argumentos de que isto sería o conveniente", o presidente da Xunta detallou que o Consello deu luz verde a este proxecto conxunto co sector que enviará ao Goberno central.
PROXECTOS
Conforme precisou, o valor total das 19 propostas elévase a 400 millóns de euros. Delas, oito son proxectos deseñados directamente pola Xunta falando polo sector. Entre eeles, 'Cultura Emerxente', que buscará difundir os procesos creativos dentro e fóra de Galicia; 'Cultura Circular', que terá como obxectivo a dixitalización da cultura; 'A Nosa Pegada' para crear unha base de datos de todos os bens patrimoniais galegos ou 'Museo Plus' que potenciará a innovación dos museos que existen en Galicia.
O quinto proxecto, 'Confins dos verdes castros', orientarase á recuperación do patrimonio arqueolóxico; o sexto, 'Ribeira Sacra', reforzará a conservación desta zona con vistas á súa candidatura a Patrimonio Mundial da Unesco; o sétimo, 'Stellae 5.0.' impulsará a dixitalización dos recursos patrimoniais en torno ao Camiño de Santiago; e o oitavo, 'Proxecto Nos', terá como obxectivo garantir a presenza do galego nas novas tecnoloxías.
Este oito propostas complétanse con outros 11 proxectos con participación da Xunta pero impulsadas directamente por entidades culturais e que versan sobre asuntos como a recuperación de oficios tradicionais, o estudo sobre o impacto da música en pacientes con enfermidades neurodexenerativas e o fomento das artes escénicas no rural, entre outras cuestións.
O presidente recoñeceu que a cantidade de axuda que estes proxectos poderán recibir aínda non se sabe tendo en conta que non está convocado o perte, pero detallou que a Xunta busca "evitar a automatización de pertes" que provoca dificultades a proxectos que "merecen a pena". "O que fixemos foi concentralos en proxectos potentes, que implican 400 millóns e agora veremos canto se podería financiar a través de fondos Next Generation, entendemos que non menos dun 15%", sostivo.
Rueda criticou a "ausencia de iniciativa" do Estado en materia de cultura para os fondos europeos. "O que se detectou, non só pola Xunta e por outras comunidades autónomas senón polo propio sector, é que non se está pensando en ningún perte no ámbito da cultura", censurou.
