Persoas en situación de exclusión claman contra a "violencia e os malos tratos administrativos"

Persoas en situación de pobreza e exclusión e entidades que traballan neste ámbito participaron este xoves en Santiago no XIII Encontro Galego de Participación que organiza EAPN Galicia e tras o que leron un manifesto para reclamar ás administracións medidas que "dean resposta ás necesidades das persoas" aínda que, advertiron, non piden "caridade".

As persoas participantes clamaron contra a "violencia e malos tratos administrativos" ao que, segundo as súas palabras, as someten as administracións, e criticaron cuestións como "a falta de vivendas dignas", os "recortes nos servizos públicos" ou a "falta de recursos", aspectos aos que hai que "darlles resposta".

"Miles de persoas reciben mensaxes directas e indirectas de expulsión do estado do benestar", explicaron, cunha excesiva burocracia, "requisitos baseados na aporofobia" ou trabas de acceso a contas bancarias e axudas. Por iso, lembraron, non buscan "caridade", senón que "se garantan os dereitos de todas as persoas" en ámbitos como a administración, a enerxía ou a banca. "Podemos aceptar que os cambios sexan lentos, pero non que non existan", destaca o manifesto.

Por iso, esixiron ás administracións que se garanta que todas as persoas teñan medios e formación para acceder a servizos en liña, contando mesmo cunha "figura de acompañamento"; que exista máis persoal e un trato "máis humano"; que se avalíe cada situación de maneira individualizada e que se simplifiquen os requisitos de acceso a axudas, así como que se reduzan os prazos de tramitación e recepción.

Acto de EAPN en Santiago | Fonte: Europa Press