Petición ao Goberno central para protexer o xacemento arqueolóxico de Vilantime, en Arzúa

Segundo os datos achegados polo equipo arqueolóxico encargado da escavación, os restos son dunha aldea castrexa da época galaico-romana, con 2.000 anos de antigüidade.

Por E.P. | SANTIAGO DE COMPOSTELA | 01/07/2022 | Actualizada ás 15:14

Comparte esta noticia

O deputado do BNG no Congreso, Néstor Rego, rexistrou iniciativas para solicitar ao Ministerio de Transportes, Mobilidade e Axenda Urbana que adopte todas as medidas necesarias, en colaboración coa Xunta e co Concello de Arzúa, para a conservación e a posta en valor dos restos arqueolóxicos situados no lugar de Vilantime atopados durante as obras da A-54.

Así mesmo, Rego pediu ao Goberno que asegure o depósito das pezas atopadas nun museo público galego próximo ao lugar da escavación para a súa exposición, así como levar a cabo un proceso de musealización da zona.

Tal como informou o BNG nun comunicado, durante a execución das obras na autovía A-54, que une Santiago con Lugo, foi localizado un xacemento arqueolóxico de gran importancia para a investigación histórica de Galicia e, especialmente, da comarca de Arzúa.

Segundo os datos achegados polo equipo arqueolóxico encargado da escavación, os restos son dunha aldea castrexa da época galaico-romana, con 2.000 anos de antigüidade. A área arqueolóxica ten uns 2.000 metros cadrados aproximadamente, aínda que todo apunta que o xacemento supere a zona escavada ata a data, xa que, a escasos metros, hai meses atopáronse restos de edificacións circulares de época calcolítica, datadas entre os anos 1.700 e 3.000 antes de Cristo.

"Trátase dun xacemento único en Galicia que debe ser conservado para o seu estudo e posta en valor. Entendemos que hai que ampliar a zona escavada porque as investigacións demostran que o complexo arqueolóxico é máis grande", reivindicou Rego.

Néstor Rego no Congreso.. BNG
Néstor Rego no Congreso.. BNG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta