Piden 25 anos de prisión para o acusado de matar a súa parella con catro puñaladas no pescozo en Lugo

A Fiscalía solicita 25 anos de prisión para o acusado de matar a súa parella, unha muller de 49 anos de idade, acoitelándoa no pescozo o día 7 de febreiro de 2020 no barrio lugués das Gándaras. O acusado será xulgado a partir deste luns na Audiencia provincial de Lugo.

No seu escrito de acusación, o Ministerio público, que destaca que o home permanece no cárcere desde o 11 de febreiro dese ano, lembra que os feitos ocorreron no domicilio que ambos os dous compartían na cidade.

En concreto, sinala que, "tras manter unha discusión" e consciente do "grave estado de embriaguez no que se atopaba" a muller, que non tiña posibilidade de "opor unha defensa eficaz", asestoulle "catro puñaladas" cun coitelo de 19 centímetros no pescozo. A consecuencia diso, a muller, que tiña dous fillos de 17 e 30 anos, faleceu.

Por todo iso, a Fiscalía pide que o acusado sexa condenado a unha pena de 25 anos de cárcere como autor dun delito de asasinato. Ademais, pide indemnizar á filla de 17 anos con 84.000 euros e ao fillo de 30 anos con 52.000 euros. Tamén pide o abono de 42.000 euros á nai da falecida e de 15.000 ao irmán desta por conceptos de danos morais.