Por E.P. | Santiago de Compostela | 04/07/2022 | Actualizada ás 20:59
O BNG desmárcase do acordo tácito para a renovación do consello de administración da Corporación de Radio Televisión de Galicia (CRTVG), que ten pendente a inclusión de dous integrantes a proposta do PPdeG, tras a dimisión de dous dos seus membros. Así, os nacionalistas poñen condicións para dar o seu apoio, xa que a votación precisa dunha maioría reforzada, pero con algúns votos do PSdeG sería suficiente para lograr este obxectivo.
A inclusión da renovación dos nomes do consello da CRTVG está previsto que se debata na reunión da xunta de portavoces deste martes no Parlamento de Galicia, tras comparecer Margarita López Blanco e Álvaro Alonso Filgueira na comisión parlamentaria que controla o funcionamento do ente público. Isto permitiría incluílo no pleno ordinario da semana que vén.
Con todo, a Executiva do BNG, segundo fontes nacionalistas, acordou supeditar o apoio do grupo parlamentario a que haxa unha "intención clara" de desenvolver a normativa vixente que regula a CRTVG, máxime, dixeron, despois da sentenza xudicial que quedou ratificada e que condena o ente público por "persecución política", como así lle reprochou esta formación en comisión a pasada semana.
Así as cousas, o Bloque pon como condición que se aprobe o estatuto profesional da CRTVG, inclusive coa creación do consello de informativos, e que se renove a dirección actual, que encabeza Alfonso Sánchez Izquierdo desde 2009 --e cuxo mandato xa caducou--.
Con todo, aínda que a renovación dos cargos ten que ser por maioría reforzada de 50 votos en primeira volta e 45 en segunda, ao PPdeG bástalle o apoio de oito ou tres deputados do PSOE --se o BNG mantén esa postura-- para sacar adiante a renovación no pleno da semana que vén, cando tamén está previsto que se substitúan senllos postos que lle corresponden aos socialistas e populares no Consello de Contas
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.