A oposición presionará a Rueda no último pleno do curso pola situación sanitaria e a fin da Tarxeta Básica

Os grupos da oposición redobrarán a súa presión política sobre o presidente da Xunta, Alfonso Rueda, no último pleno ordinario do curso antes do parón estival, no que demandarán explicacións sobre a situación na sanidade e a supresión da 'Tarxeta Básica'.

A orde do día da primeira e última sesión do mes de xullo foi configurada este martes na xunta de portavoces, onde o BNG tratou sen éxito de lograr unha comparecencia do xefe do Executivo galego ante a "situación de emerxencia social, económica e sanitaria sen precedentes que vive Galicia".

"A señora Pontón debería vir máis por aquí (Parlamento)", espetou o viceportavoz dos populares Alberto Pazos Couñago, que incidiu en que eses asuntos foron os temas que centraron a sesión de investidura de Rueda, celebrada, como lembrou, hai menos de dous meses.

"É certo que estivo máis pendente da súa performance de autopromoción persoal dunha investidura que non existía, a súa; e iso fíxolle non escoitar ao presidente", aseverou Pazos Couñago.

Así as cousas, a comparecencia deste pleno estará protagonizada polo conselleiro de Educación, Román Rodríguez, que abordará as novidades do próximo curso de Formación Profesional.

Tomará a palabra tras a valedora do Pobo, María Dolores Fernández Galiño, quen presentará ante o pleno a súa memoria anual despois de que a Cámara vote a proposta de renovación dos consellos da CRTVG e Contas, pactada entre PP e PSdeG.

Deste xeito, o último debate dos portavoces da oposición --Ana Pontón (BNG) e Luís Álvarez (PSdeG) con Alfonso Rueda estará centrado na "situación de emerxencia" que, segundo nacionalistas e socialistas, atravesa Galicia polas consecuencias da pandemia, a crise de prezos e a "deterioración" dos servizos públicos

"Este país non pode permitirse un presidente insustancial, instalado no parche e na propaganda", afirmou o deputado do BNG Manuel Lourenzo, que engadiu que a súa xefa de filas aproveitará para expor as "alternativas" do BNG durante a sesión de control.

Pola súa banda, os socialistas porán o foco na supresión da 'Tarxeta Básica', orientada a sufragar os custos de bens básicos de persoas vulnerables (alimentación, hixiene ou produtos farmacéuticos) e cuxo fin foi anunciado a pasada semana pola Xunta.

Segundo a parlamentaria do PSdeG Begoña Rodríguez, "é chocante" que o presidente de Goberno galego decida ao mes e medio de chegar eliminar unha das medidas "de maior calado" ante unha situación "postpandémica e inflacionista".