Por Europa Press / Redacción | SANTIAGO DE COMPOSTELA | 06/07/2022 | Actualizada ás 11:42
O presidente da Xunta, Alfonso Rueda, destacou que é "un orgullo e, mesmo, unha sorte" que a empresa téxtil Inditex sexa galega e "teña vocación de permanencia en Galicia".
Así o manifestou ante os medios nun acto en Santiago, antes de acudir este mesmo mércores ás instalacións de Inditex en Arteixo en compañía do seu vicepresidente económico, Francisco Conde, na que será a súa primeira visita como novo titular do Goberno galego.
"É unha visita que, persoalmente ademais, apetéceme moito", recoñeceu Rueda, porque a compañía fundada por Amancio Ortega é "un referente mundial". "É un orgullo de que sexa unha empresa galega, coa súa sede social e instancias principais en Galicia. Merecen este recoñecemento e o apoio que lle podamos dar desde o Goberno de Galicia", engadiu.
Ademais, o presidente da Xunta asegurou que Inditex "fai marca Galicia en moitísimos lugares" e ten "vocación de permanencia" en Galicia. "E a partir de aí, cara ao mundo e cara a uns límites que agora mesmo non se coñecen", agregou. Por todo iso, Rueda apelou a "non esquecer nunca" que as orixes e as raíces da compañía son galegas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.