GOE-Asime insiste en que a eólica mariña e os usos pesqueiros son compatibles
O secretario xeral do Galician Offshore Energy Group (GOE-Asime), Enrique Mallón, embrou que 60.000 familias viven da industria do metal en Galicia e que "o espazo que se pode dedicar a parques eólicos nunca vai ser superior ao 1-2%, unha cantidade mínima de todo ese espazo marítimo".
Por E.P. | SANTIAGO DE COMPOSTELA | 07/07/2022 | Actualizada ás 17:10
O secretario xeral do Galician Offshore Energy Group (GOE-Asime), Enrique Mallón, asegurou ao termo da reunión interna que se celebrou esta mañá en Ferrol que o desenvolvemento de parques de eólica mariña na costa galega é "perfectamente compatible" coa actividade pesqueira.
"Loxicamente, apostamos por estudar ata o máis mínimo detalle" dunhas implantacións que establecerá o Plan de Ordenación de Espazos Mariños que Mallón cre que se poderían publicar despois do verán. "Os grandes ambientalistas, como Greenpeace", engadiu, "defenden o desenvolvemento da eólica mariña e nós queremos que a industria galega aproveite os recursos que temos".
Así, o secretario xeral de GOE-Asime lembrou que 60.000 familias viven da industria do metal en Galicia e que "o espazo que se pode dedicar a parques eólicos nunca vai ser superior ao 1-2%, unha cantidade mínima de todo ese espazo marítimo".
"Galicia, e sobre todo Ferrol, mostrou as súas capacidades como hub de construción de equipamentos e compoñentes para parques eólicos mariños", apuntou Mallón, que lembrou que "máis de 40 empresas" participan xa neste sector, "dando emprego directo a máis de 1.200 persoas e indirecto a unhas 600".
"Estas cifras", apuntou, "pódense polo menos duplicar se facemos unha implantación de eólica mariña potente", pois, incidiu, "é unha oportunidade enorme para as empresas galegas".
