Rueda ve Galicia como "un referente no turismo sustentable"
Rueda destaca os bos datos turísticos, con máis de 173.000 compostelas entregadas, "cifra marca".
Por Europa Press / Redacción | SANTIAGO DE COMPOSTELA | 11/07/2022 | Actualizada ás 17:17
O presidente do Goberno galego, Alfonso Rueda, salientou a aposta da Xunta por afianzar Galicia "como un referente no turismo sustentable", para o que se está impulsando, en colaboración co Clúster Turismo de Galicia, o 'Club de Produto Galicia Destino Sustentable', unha iniciativa que "permitirá integrar toda a oferta turística deste tipo que hai no territorio galego e mellorará a competitividade de Galicia neste ámbito".
No acto de presentación do Club, no restaurante Culler de Pau do Grove, Rueda destacou que, con esta iniciativa, a Xunta busca traballar man a man con aquelas empresas do sector (aloxamentos, restaurantes e axencias de viaxes, entre outras) interesadas en ofrecer produtos turísticos máis sustentables. O obxectivo é impulsar e axudar mediante asesoramento e financiamento a posta en marcha de iniciativas sustentables na liña do que demandan cada vez máis viaxeiros.
"Os turistas xa non queren só recibir un servizo, queren vivir unha boa experiencia. É o momento de apostar pola calidade, polo sustentable", asegurou o presidente. A creación do Club terá vantaxes tanto para as empresas como para viaxeiros e Galicia, xa que o obxectivo é agrupar nun único catálogo toda a oferta turística sustentable, explica.
REQUISITOS
O presidente da Xunta animou as empresas do sector a unirse a esta iniciativa que o Goberno galego pon en marcha en colaboración co Clúster Turismo de Galicia. Para poder adherirse ao Club de Produto Galicia Destino Sustentable, as empresas terán que cumprir unha serie de requisitos vinculados ao respecto ao medio ambiente como a xestión de residuos, a eficiencia enerxética ou o aforro de auga.
Neste sentido, Rueda resaltou o exemplo de oferta turística sustentable que ofrece Culler de Pau, o único restaurante con dúas estrelas Michelin de Galicia e que tamén foi recoñecido coa estrela verde desta guía culinaria polo seu modelo sustentable. A filosofía do establecemento do chef Javier Olleros ten como prioridade o respecto pola contorna ao apostar polo produto local e estar concienciado coa economía circular.
MÁIS DE 170.000 COMPOSTELAS ENTREGADAS
Por último, o titular da Xunta destacou os bos datos do turismo no que vai de ano, con máis de 1,7 millóns de visitantes e máis de 173.000 compostelas entregadas, "cifra marca". A previsión do Goberno galego é conseguir no ano 2023 o cinco millóns de visitantes, é dicir, volver aos datos previos á pandemia.
