Onda de calor: a metade de Galicia está en risco extremo de incendio forestal este martes

A metade do territorio galego está en risco extremo de incendio forestal este martes, 12 de xullo, xornada na que só A Mariña luguesa está fóra dos niveis altos. Así figura no Índice de risco diario de incendio forestal (IRDI), que elabora a Consellería de Medio Rural. Téñense en conta a análise de diversos factores que inflúen no comportamento do lume, tales como condicións de seca, humidade, temperatura e vento.

Deste xeito, a totalidade da provincia de Ourense está en risco extremo, situación na que tamén se atopa todo o interior e algúns puntos da costa da provincia de Pontevedra. O interior e, fundamentalmente, o sur da provincia de Lugo tamén figura na lista de zonas en risco extremo, que afecta a puntos localizados da provincia da Coruña. O resto está en risco alto ou moi alto coa excepción da Mariña, onde o nivel é moderado.

Galicia atravesa os efectos dunha onda de calor que obrigou a decretar a alerta vermella na provincia de Ourense e a laranxa no resto de Galicia ante a previsión de que se alcancen temperaturas próximas aos 40 graos que poderían mesmo dispararse por encima deste valor en puntos do interior.

Así, a conca do río Miño na provincia de Ourense permanecerá este martes en alerta vermella polas altas temperaturas que se prevén na zona, onde se espera que os termómetros pasen dos 42 graos. A Dirección Xeral de Emerxencias e Interior da Vicepresidencia Segunda da Xunta decretou este aviso meteorolóxico extremo para a zona do Miño, mentres mantén o nivel laranxa en case a metade do territorio galego ante a previsión de temperaturas de entre 37 e 39 graos.

Este segundo nivel de alerta estará activo no noroeste e o sur da provincia de Ourense, no interior e suroeste da Coruña; así como na totalidade da provincia de Pontevedra. A situación foi comunicada desde a Dirección Xeral de Emerxencias e Interior aos concellos e provincias afectadas para que activen os seus protocolos en aras de minimizar o impacto da onda de calor sobre a poboación.

O concello de Carnota, na Coruña, marcou este martes a temperatura máis alta de Galicia á primeira hora da mañá. En concreto, segundo os datos de Meteogalicia, na parroquia de Lira, o termómetro rexistrou 30,8 graos ás 08,00 horas. Ás 10,10 horas xa superaba os 32. As estacións de Meteogalicia xa reflectiron antes das 10,00 horas varios municipios que superan os 30 graos, entre eles, os pontevedreses de Redondela (31,4 graos), Mondariz (31,2 graos), Poio (31 graos) ou Meis (31,1 graos).

NIVEL MÁXIMO DE ALERTA

O pasado luns, a Xunta estendeu o nivel máximo de alerta por onda de calor polos valores "extremos" que alcanzarán os termómetros ata o vindeiro venres. O nivel tres (máximo) xa fora declarado a pasada semana en Pontevedra e o fin de semana tamén se alertou de altas temperaturas en Ourense. Os centros sanitarios galegos están sobre aviso polo "previsible aumento" de patoloxías asociadas á calor.

Fontes do servizo galego de meteoroloxía, Meteogalicia, sinalaron a Europa Press que esta onda de calor expandirase, como mínimo, ata o venres. Ademais, esta onda de calor "extrema" rexistrará temperaturas superiores aos 40 graos en varios puntos das provincias de Pontevedra, Lugo e Ourense.

Respecto da súa duración, segundo fontes de Meteogalicia, esta situación pode ser unha das ondas de calor "máis longas" rexistradas en Galicia desde que hai rexistros. Ata o venres, como mínimo Galicia permanecerá baixos os efectos dunha masa de aire "moi cálida" de orixe norteafricana.

No entanto, como informou a Xunta, cara ao fin de semana achegarase unha Depresión Illada en Niveis Altos (DANA) no Atlántico, ao oeste da península Ibérica, que fará que a intensidade e a duración do aire cálido sexa superior a outros episodios. Isto fará, así mesmo, que as temperaturas, tanto mínimas como as altas, sexan moi elevadas durante o período.

A situación finalizará co achegamento da DANA a Galicia, previsiblemente durante o fin de semana, xa que nese momento haberá inestabilidade e por tanto nubes, treboada e a entrada de aire atlántico máis fresco e húmido que ocasionaría un importante descenso nos termómetros.

RISCO DE INCENDIOS

Doutra banda, desde Meteogalicia alertaron acerca da posibilidade de incendios. "Existe un risco potencial moi alto durante esta semana en, practicamente, toda Galicia", sinalou un experto do servizo meteorólogo. Segundo os datos de Meteogalicia, Ourense sufrirá as maiores temperaturas. Desde este luns ao xoves, a provincia interior permanecerá por encima dos 40 graos, con máximas de 42 graos o martes 12 de xullo e o xoves 14. As maiores temperaturas estímanse nas rexións do Canón do Sil e a depresión de Ourense.

Pola súa banda, a provincia da Coruña rexistrará os datos máis suaves estes días. A temperatura máxima na zona será o xoves 14 de xullo, con 31 graos. O resto de xornadas --11, 12 e 13 de xullo-- terán, respectivamente, máximas de 24, 28 e 27 graos. Santiago tamén contará con altas temperaturas nas próximas xornadas, con máximas de 36 graos. Ademais da capital galega, Lugo e Pontevedra atópanse nunha situación similar, con temperaturas que pasarán os 36 e 38 graos, respectivamente.

A zona de Vigo, ademais de computar días por encima dos 34 graos, terá as noites máis cálidas de toda a comunidade. Coa excepción do luns, con 15 graos, as temperaturas mínimas en Vigo non baixarán dos 20 graos. A noite máis calorosa situarase este xoves, cando as mínimas non descenderán dos 25 graos.

RECOMENDACIÓNS

Pola súa banda, a Consellería de Sanidade recomenda beber máis líquido do habitual sen esperar a ter sede, sobre todo auga e zumes de froita lixeiramente fríos. Deberase evitar inxerir bebidas quentes, alcohólicas, café, té e as moi azucaradas. Tamén se recomenda comer froitas e verduras e evitar as comidas copiosas.

Respecto da vestimenta, recomenda usar tecidos naturais, roupa lixeira e folgada, de cores claras, chapeus, fagas de sol e cremas protectoras solares. O calzado, cómodo, fresco e que transpire.

En canto ao interior de edificios, recomenda permanecer en lugares ventilados ou acondicionados e utilizar as habitacións máis frescas da vivenda. Tamén se poderán usar ventiladores e nos momentos de calor máis intensa, pódese refrescar o corpo cunha ducha ou auga tépeda. Ademais, procurarase evitar aglomeracións de persoas en locais sen aire acondicionado.

No exterior, evitaranse, na medida do posible, as actividades a horas calorosas, reducirase a actividade física, buscaranse sombras e, cando se estacione o coche, non se deberá deixar no interior nin a crianzas nin a persoas maiores, nin ningún animal de compañía.

Ademais, convén non ir á praia nas horas de máxima calor (mediodía e a primeiras horas da tarde). Tampouco nunca debe quedar ninguén durmido tomando o sol. Respecto das cremas de protección, utilizaranse as de maior protección posible e nunca inferior a 15. E se ten parentes ou veciñanza que vivem sós, é conveniente facerlles un seguimento especial estes días, co fin de comprobar que adoptan as medidas recomendadas e o seu estado de saúde é o habitual.