As embarcacións cantadas por Rosalía volven remontar o Ulla e o Sar

Vinte embarcacións tradicionais de todo o país uníronse novamente á “Inchadiña branca vela” nunha homenaxe das xentes do mar a Rosalía de Castro. Subrion o Ulla e o Sar embarcacións chegadas das rías de Vigo, Pontevedra, Arousa, Noia e A Guarda: gamelas, bucetas, botes e dornas de distinto tipo, chamadas pola Fundación Rosalía de Castro e a A.C. Dorna da Arousa, coa colaboración do Concello de Padrón, de Catoira, de Dodro e de Valga, ademais da adega Paco&Lola.

A Inchadiña deste ano estivo dedicada ao mariñeiro Parada, que participou en todas as edicións coa súa dorna Forza R e mesmo protagonizou o cartel da segunda. A el dedicóuselle un minuto de silencio diante durante a ofrenda na estatua de Rosalía. "A xornada de navegación foi pracenteira: coa marea e o vento a favor", indican nun comunicado.

Esta actividade, que se celebrou por primeira vez en 2013 para celebrar o 150 aniversario da publicación de ‘Cantares gallegos’, xurdiu como iniciativa das xentes da cultura marítima para honrar a unha autora que en ‘Cantares’ falaba das dornas que subiran Ulla arriba no seu tempo.