Por Europa Press / Redacción | Santiago de Compostela | 21/07/2022 | Actualizada ás 14:04
O salario bruto anual alcanzou os 21.856,41 euros en 2021 en Galicia, o que supón un aumento do 4,7% en comparación con 2020 e un 73,21% do custo total por traballador, segundo os resultados da Enquisa Anual de Custo Laboral (EACL), publicada este xoves polo Instituto Nacional de Estatística (INE).
O INE explicou que os datos de 2021 "están distorsionados" polas medidas de apoio aos traballadores e as empresas que seguiron vixentes ao longo do ano pasado, tras a pandemia, aínda que con menos incidencia que en 2020. Así, os traballadores acollidos a Expedientes de Regulación Temporal de Emprego (ERTE) seguiron pertencendo ao persoal das súas empresas, pero non foron remunerados con salarios, senón con prestacións achegadas directamente polo Servizo Público de Emprego Estatal (SEPE) e, nalgúns casos, complementadas polas propias empresas.
Entre outros datos, o custo bruto por traballador en 2021 situouse en Galicia nos 29.854,16 euros, dos cales 21.856,41 euros eran soldos e salarios; 7.185,69 euros eran cotizacións obrigatorias; 101,60 euros eran cotizacións voluntarias; 268,59 euros eran prestacións sociais directas; 441,87 euros eran outros gastos e 211,31 euros eran subvencións e deducións, polo que o custo neto situouse nos 29.642,85 euros, un 4,1% máis.
A nivel estatal, o salario bruto anual alcanzou os 24.248,78 euros o ano pasado, un 6,2% máis que en 2020 (+3,4% se se compara con 2019, último ano antes da pandemia) e un 73,7% do custo total por traballador, que foi de 32.906,63 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.