Pontón ve "pouco ambiciosas" as peticións de Rueda a Sánchez e remítelle máis
Propón crear unha comisión mixta para que Galicia teña beneficios pola produción eléctrica ou a transferencia do ingreso mínimo vital.
Por Europa Press / Redacción | SANTIAGO DE COMPOSTELA | 26/07/2022 | Actualizada ás 13:20
A portavoz nacional do BNG, Ana Pontón, manifestou a necesidade de "elevar o listón" das demandas das que parte a proposta do presidente da Xunta, Alfonso Rueda, para a reunión que manterá esta semana co xefe do Executivo, Pedro Sánchez. A líder nacionalista cualificou de "pouco ambiciosas" as iniciativas expostas e remitiulle este mesmo martes unha misiva con máis propostas.
Tras asegurar, en rolda de prensa, que o BNG se sitúa á beira da defensa dos "intereses" de Galicia e que aí atopará o apoio dos nacionalistas, Pontón expuxo medidas para reclamar a Sánchez, entre elas, a declaración de zona catastrófica dos lugares máis afectados polos incendios que arrasaron a Galicia nas dúas últimas semanas.
Así mesmo, Pontón apostou por ser máis concretos en demandas como a de prazas MIR, de forma que sexa Galicia a que poida escoller a oferta que se fai, tanto para estes exames, como para os de psicoloxía e os de enfermaría.
Entre outras cuestións, o BNG reclama unha comisión mixta Xunta-Estado para definir como se poden repercutir os beneficios da produción eléctrica en Galicia; a transferencia do ingreso mínimo vital; unha auditoría de túneles e pontes e fixar un calendario de reparación para a conexión da A-6; e a bonificación dos trens de media distancia.
"Temos máxima disposición para sumar nos intereses de Galicia", tendeu a man, a líder nacionalista, quen reclamou que "pór encima da mesa unha proposta ambiciosa". "É necesario elevar o listón á hora de defender os intereses dos galegos", proclamou, para trasladar, a continuación, "toda a disposición do BNG de sumar", con "propostas realistas" para "defender os intereses" de Galicia.
