Por Europa Press / Redacción | Santiago de Compostela | 28/07/2022 | Actualizada ás 11:00
A Asociación Galega de Enfermaría Familiar e Comunitaria (Agefec) reclamou "poder seguir ofrecendo continuidade de coidados" nos Puntos de Atención Continuada (PAC) de Galicia. Fixérono mediante un comunicado en relación, sinalan, á ausencia de cobertura de médicos nalgúns PAC e a diferentes reseñas de prensa nas que se apuntaba a que sen médico, a enfermeira non realiza diagnósticos nin dispensa fármacos.
Ante isto, defenden a importancia do traballo en equipo, "un equipo multidisciplinar onde cada profesional achega o específico do seu quefacer para garantir o mellor servizo á cidadanía".
"Ninguén debe dubidar da capacidade resolutiva das enfermeiras. Temos competencias para actuar, tanto en equipo como individualmente, ante situacións de urxencia, pero, desde a asociación defendemos que, se nalgún momento e de forma puntual, nun centro non houbese persoal médico, as enfermeiras debemos seguir ofrecendo os nosos servizos á poboación", aseguran.
Afirman ser "conscientes" de que nestes momentos a Atención Primaria sofre "dificultades" para garantir a cobertura dos profesionais dada a carencia dos mesmos. "Esta situación viuse agravada polo período estival, pero non debemos esquecer que esta falta de persoal non é un problema conxuntural debido ás vacacións, senón que se trata dun problema estrutural que a Atención Primaria sofre desde hai tempo", comentan.
Con todo, censuran que a Administración "só se acorde das enfermeiras cando hai déficit doutros profesionais, sobre todo cando o número de enfermeiras de Atención Primaria está por baixo dos cocientes recomendados".
"A situación na que se atopa a cobertura destas enfermeiras vai polo mesmo camiño que a do persoal médico e cando temos un gran número de enfermeiras especialistas en Enfermaría Familiar e Comunitaria traballando noutros ámbitos ou noutras Comunidades debido a que non se lles ofrece fidelización contractual por parte do Sergas, malgastando, así, o diñeiro investido na súa formación", lamentan.
SATSE
O sindicato de enfermaría Satse denunciou trato "discriminatorio" que dispensa o Sergas ao colectivo de enfermaría hospitalaria con respecto a Atención Primaria. O delegado en Lugo de Satse, Manuel Veiga, vinculou ESE trato a que "a Administración está a apostar pola Atención Primaria, onde se están incrementando os incentivos".
"Se somos traballadores da mesma empresa, nun lado trátasenos dunha forma e noutro lado doutra forma. Non ten sentido", clamou o sindicalista.
Veiga afirmou que Satse "comprende o problema da Atención Primaria e apoia o seu reforzo". "Pero non podemos pasar por alto o problema no ámbito hospitalario coas urxencias colapsadas ou as plantas pechadas", aseverou.
"Non podemos admitir que o Sergas se esqueza desta demanda e se envorque en dar solución á falta de médicos cando o problema é que non hai enfermeiros", lamentou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.