A CUT protesta polo "despedimento masivo de interinos" en educación

A central sindical CUT fixo un chamamento a manifestarse este luns 1 de agosto, ás 11,30 horas, fronte á Consellería de Educación, en Santiago, ante "o despedimento masivo de interinos en ensino".

Nun comunicado, o sindicato denuncia o "despedimento de traballadores temporais para o próximo curso". Neste sentido, sinalan que esta situación "afectará a todas aquelas persoas que desenvolveron o seu traballo como interinos ou substitutos".

A central sindical asegura que esta circunstancia é froito de "anos de recortes e unha política de privatización e de transferencia de recursos públicos cara ao ensino privado, ligados á falta dun verdadeiro proceso de estabilización".

Así mesmo, engade que xa presentaran no 2021 no Parlamento de Galicia unha Iniciativa Lexislativa Popular para a estabilización dos traballadores temporais da Xunta que "foi rexeita polos deputados do Hórreo".

A CUT insiste na "falta dun proceso de estabilización" do persoal temporal da administración de Galicia que "finalice co abuso da temporalidade"; unha situación de "fraude de lei" e pola cal "as institucións europeas reclamaron ao Goberno unha solución".

Traballadores do sindicato CUT protestan ante o Parlamento de Galicia para pedir a aprobación dunha iniciativa lexislativa popular para reducir a temporalidade no sector público. | Fonte: Arquivo