Estabilizado o incendio de Boiro tras cinco días de loita e máis de 2.000 hectáreas calcinadas

Os lumes de Verín e Ponte Caldelas están xa controlados, mentres que os declarados en Arbo foron extinguidos.

Por Europa Press / Redacción | SANTIAGO DE COMPOSTELA | 07/08/2022 | Actualizada ás 20:44

Comparte esta noticia

A Consellería do Medio Rural deu por estabilizado ás 12,28 horas deste luns o incendio declarado o pasado xoves na parroquia de Cures, no municipio coruñés de Boiro, e que afectara tamén aos concellos da Pobra do Caramiñal e Ribeira. Este lume é o de maior superficie calcinada no mes de agosto en Galicia, con 2.200 hectáreas ardidas.

Así mesmo, Medio Rural notificou que quedaron xa controlados os incendios forestais da parroquia de Xustáns, na localidade pontevedresa de Ponte Caldelas --ás 12,05 horas-- e o de Verín, en Ourense --ás 11,51 horas--.

O de Ponte Caldelas, que tamén afectou ao concello de Pontevedra, calcinou 380 hectáreas, segundo as estimacións provisionais detalladas pola Consellería con datos recolleitos ata as 13,30 horas deste luns. Mentres, no de Verín, que a Xunta indicou que se iniciou en dez focos diferentes, arderon unhas 600 hectáreas.

Por outra banda, permanece controlado o lume de Caldas de Reis, declarado na parroquia de Saiar e que se estendeu ata o veciño concello de Vilagarcía. Segundo as últimas estimacións, a superficie afectada é de 450 hectáreas.

OUTROS INCENDIOS EXTINGUIDOS

Ademais, a Xunta deu por extinguidos os incendios que permanecían activos no municipio pontevedrés de Arbo. En concreto, o da parroquia de Mourentán foi extinguido ás 23,00 horas deste domingo, cunha superficie afectada de 484,68 hectáreas --364,68 de arboredo e 120 hectáreas de monte raso--. O de Barcela, que se deu por extinguido á mesma hora, calcinou 82 hectáreas --70 de arboredo e 12 de monte raso--.

Este luns, a Consellería tamén notificou que extinguiu ás 03,40 horas un incendio forestal no concello ourensán de Calvos de Randín, que se iniciou ás 00,56 deste luns e que afectou a 0,1 hectáreas de monte raso do Parque Natural Baixa Limia-Serra do Xurés. En total, os incendios forestais que se produciron na última semana na comunidade galega calcinaron xa unhas 4.500 hectáreas nas provincias de Ourense, A Coruña e Pontevedra.

Bombeiros traballan na extinción dun incendio iniciado en Boiro, a 6 de agosto de 2022, en Boiro, A Coruña (Galicia).. César Arxina - Europa Press
Bombeiros traballan na extinción dun incendio iniciado en Boiro, a 6 de agosto de 2022, en Boiro, A Coruña (Galicia).. César Arxina - Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gamela

Este comentario vai dirixido a redatores e lectores do Galicia Confidencia en tempos tan escuros onde a manipulación informativa está tódolos días en calquera lugar, para que sigamos adiante buscando a Verdade da Información // https://twitter.com/juanmacorre/sta...