Xullo foi "extremadamente cálido" e "moi seco" en Galicia, cun 66% menos de choivas e unha onda de calor histórica

É o peor verán dende 1981.

Por Europa Press / Redacción | Santiago de Compostela | 08/08/2022 | Actualizada ás 13:45

Comparte esta noticia

Galicia rexistrou un mes de xullo "moi seco" no que respecta ás precipitacións e "extremadamente cálido" en canto ás temperaturas, cunha onda de calor histórica entre os días 11 e 15, segundo conclúe o avance do último informe climatolóxico de Meteogalicia.

Pantano de Penarrubia, en Rubiá (Ourense), cun nivel moi baixo de auga.. ECOLOXISTAS EN ACCIÓN OURENSE
Pantano de Penarrubia, en Rubiá (Ourense), cun nivel moi baixo de auga.. ECOLOXISTAS EN ACCIÓN OURENSE

Con datos recollidos nas 11 estacións meteorolóxicas representativas da Comunidade, a anomalía media da temperatura do mes pasado foi +2,7 graos centígrados. Neste sentido, as temperaturas máximas foron de media 3,9 graos superiores ao habitual, mentres que as mínimas estiveron 1,54 graos por encima. "Tanto nas máximas como nas medias a anomalía en xullo foi a máis elevada da serie desde 1981", asegurou a Xunta nun comunicado.

En concreto, o valor medio das temperaturas máximas foi de 28,1 graos, rexistrándose as máis altas nas ribeiras do Sil, no Miño ourensán e na comarca de Verín, con cifras próximas aos 36 graos. Pola contra, os valores máis baixos déronse na Mariña lucense e na comarca de Ortegal, con datos próximos aos 18,9 graos.

En canto ás temperaturas mínimas, o valor medio de toda Galicia foi de 14,6 graos, rexistrándose os máis baixos na comarca da Limia, con 8,4 graos, e os máis altos ao sur da provincia de Pontevedra, onde nas localidades do Condado e na comarca de Vigo chegaron aos 18,9 graos.

A ORIXE: ALTAS PRESIÓNS RECORRENTES

No apartado de precipitacións, en xullo rexistrouse un 66% menos que a media do valor climático normal, cunha repartición "moi desigual". As máis importantes producíronse durante a mañá do día 3 e na tarde-noite do 14, pero non afectaron por igual a toda a Comunidade.

"Algúns lugares quedaron con precipitacións moi escasas ou mesmo nulas e outros puntos achegáronse á normalidade ou mesmo foron húmidos", explicou a Xunta, que sinalou a Vigo e ao Condado como zonas nas que non se rexistraron choivas o mes pasado.

"A gran anomalía positiva nas temperaturas e a escaseza de precipitacións teñen a súa explicación nas altas presións, que foron predominantes durante o pasado mes, impedindo a chegada de influencias atlánticas e aproximando masas de aire moi cálido procedentes do norte de África e do sur da península Ibérica", engadiron desde a Consellería de Medio Ambiente do Goberno galego.

DATOS ESTATAIS

A nivel estatal, xullo de 2022 foi o mes máis cálido en España desde que hai rexistros e tivo unha media de 25,6 graos centígrados (ºC), a temperatura media máis alta non só en xullo senón en calquera mes do ano, polo menos desde 1961, segundo informa a Axencia Estatal de Meteoroloxía (AEMET), que engade que tamén foi o máis seco do últimos quince anos.

Esta é a segunda vez que xullo supera os 25ºC de temperatura media para o conxunto de España, pero nesta ocasión superou en 0,2ºC ao de 2015, que era ata agora era o máis cálido da serie.

O balance mensual do organismo meteorolóxico destaca ademais que a onda de calor foi "a máis importante desde que hai rexistros", pois se tratou da máis intensa, a máis extensa e a segunda máis longa da serie.

Ademais de ser extremadamente cálido, 2,7ºC por enriba da media do período de referencia 1981-2010, este período foi moi seco, xa que choveu a metade do normal polo que o de 2022 convértese no terceiro xullo máis seco do século XXI.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta