A Deputación da Coruña compromete o seu apoio ao proxecto da Cuarta Rolda e as demandas empresariais
Por E.P. | A CORUÑA | 18/08/2022 | Actualizada ás 19:35
O presidente da Deputación da Coruña, Valentín González Formoso, visitou este xoves a Asociación de Empresarios do polígono de Pocomaco, que representa 500 empresas que conforman esta área empresarial coruñesa. No encontro, comprometeuse a trasladar ao Goberno central as súas reivindicacións do proxecto da Cuarta Rolda.
Na que supuxo a primeira visita institucional á entidade desde que a nova presidenta, Lucía López Teijeira, asumiu o cargo, González Formoso manifestou o apoio da Deputación da Coruña ao proxecto da Cuarta Rolda, un viario de 2,91 quilómetros que conectaría a AC-15 (conexión ao porto exterior) e a AC-14 (Terceira Rolda), conectando os polígonos de Pocomaco e Vío.
"É unha infraestrutura necesaria para o desenvolvemento industrial da cidade", afirmou o presidente provincial, que destacou "o interese do proxecto para vertebrar as comunicacións da área coruñesa e impulsar conexións idóneas de infraestruturas estratéxicas como o porto exterior e os polígonos industriais, ademais de permitir habilitar novo chan industrial".
