Por E.P. | VIGO | 19/08/2022 | Actualizada ás 12:41
A conselleira do Mar, Rosa Quintana, reivindicou este venres que a Xunta de Galicia está a traballar co obxectivo de minimizar o impacto dos incendios ocorridos nas últimas semanas para evitar que a cinza provocada acabe chegando ao mar e afectando a bancos marisqueiros.
En declaracións aos medios de comunicación, tras ser preguntada en concreto polos labores que está a levar a cabo o Goberno galego na zona do Barbanza, Quintana subliñou que "desde o minuto un" os técnicos da Consellería do Medio Rural especialistas en recuperación de chans arrasados polo lume xa están a valorar as distintas zonas. Así, indicou que as medidas que se adoptarán en cada lugar dependerán de varias variables, como a pendente do terreo ou a situación na que se atope.
"Creo que imos ser capaces, como en anteriores ocasións, de adoptar as medidas necesarias para evitar que as cinzas poidan chegar a bancos marisqueiros. De feito, xa estamos a traballar no campo e cada departamento da Xunta que ten competencias na materia tamén está a ter as reunións cos seus sectores e buscando minimizar estes impactos", engadiu.
Segundo explicou, na actualidade está a avaliarse a situación para saber que é o que se ten que facer a partir de agora. Aínda así, Augas de Galicia xa está a traballar na limpeza de cunetas, retirando material acumulado, para que a auga poida circular sen problemas e evitar embalsamientos.
DENUNCIA DO COUREL VIVO
A agrupación municipal de Courel Vivo denunciou este xoves que entre as xornadas do martes e o mércores se produciron arrastres de "toneladas" de cinzas e terra polas ladeiras do Courel cara ás casas e ríos. Nun comunicado, reprocha que, despois dun mes do maior incendio na historia de Galicia desde que hai rexistros --11.100 hectáreas arrasadas--, "a Xunta segue sen facer nada para protexer as ladeiras e as aldeas do Courel".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.