Por E.P. | SANTIAGO DE COMPOSTELA | 20/08/2022 | Actualizada ás 13:55
A Central de Coordinación da Fundación Pública de Urxencias Sanitarias de Galicia 061 xestionou un total de 768.346 chamadas no que vai de ano 2022 en Galicia. O máximo de atencións produciuse neste mes de xullo, cando se atenderon 120.661 chamadas, o que supón unha media de máis de 3.800 chamadas ao día.
As chamadas recibidas na Central do 061 poden xerar un proceso asistencial que implique a mobilización de recursos, algo que pode estar asociado a un ou máis pacientes; ou poden ser resoltos sen necesidade de activar medios adicionais. No que vai de ano, a porcentaxe de resolución de procesos asistenciais nos que foi necesario mobilizar recursos do 061 foi do 60%, mentres que no 40% restante non foi necesario activar medios da Fundación.
En comparativa, no ano 2021, a central de coordinación recibiu 1.157.979 chamadas, xerando un total de 493.743 procesos asistenciais, o 60,1% dos cales foron resoltos mobilizando os recursos desta fundación pública. En 2020, ano que coincide co inicio da pandemia do COVID, recibíronse un total de 1.280.305 chamadas, xeráronse 578.905 procesos asistenciais e nun 48,57% deles foi necesaria a mobilización de recursos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.