O Goberno confirma implantará peaxes nas autovías a partir de 2024
Foi parte do acordo coa UE para recibir os fondos europeos.
Por Europa Press / Redacción | MADRID | 23/08/2022 | Actualizada ás 14:58
O Goberno xa iniciou os trámites para estudar as distintas posibilidades encamiñadas a introducir un novo sistema de peaxes en todas as autovías do país a partir de 2024, tal e como se comprometeu con Bruxelas a cambio de recibir os fondos europeos valorados en 70.000 millóns de euros en subvencións.
A Dirección Xeral de Estradas, dependente do Ministerio de Transportes, Mobilidade e Axenda Urbana, encargou á consultora pública Ineco a elaboración de nove informes para valorar un novo sistema de financiamento das estradas, segundo a documentación publicada no portal de contratacións.
O custo destes servizos ascenderá a 1,4 millóns de euros e o prazo establecido será de 10 meses. Ineco xa contratou os servizos de KPMG Avogados por 89.000 euros para realizar o servizo de asesoría e consultoría xurídica especializada en materia fiscal e tributaria no ámbito das estradas, como parte deste contrato.
O pasado mes de xuño, a ministra do ramo, Raquel Sánchez, descartou iniciar o debate correspondente co sector para comezar a deseñar este plan, co obxectivo de dar prioridade á situación económica, lastrada tanto pola pandemia como pola guerra en Ucraína.
No entanto, volveu confirmar que se aplicará esta medida e avanzou que xa se estaba realizando un estudo previo. De feito, á marxe do debate que se debe abrir co sector para acordar o mellor sistema posible, os plans para implantar o pago por uso nas estradas seguiu adiante.
Desta forma, o 10 de xuño formalizouse o contrato interno entre a Dirección Xeral de Estradas e Ineco, e o pasado 10 de agosto esta empresa adxudicou os servizos de consultoría a KPMG. Todos os documentos apuntan ao ano 2024 como o ano a partir do cal "poderían" implantarse as peaxes.
