Esixen ao novo xerente da área sanitaria de Pontevedra un plan de choque para evitar a folga
Os sindicatos piden dotar a sanidade de recursos humanos e económicos necesarios co fin de "recuperar un persoal estable que garanta unha asistencia digna, eficiente e de calidade á poboación.
Por E.P. | PONTEVEDRA | 24/08/2022 | Actualizada ás 12:31
Os sindicados CESM Galicia, Prosagap e CO-BAS esixen ao novo xerente da área sanitaria de Pontevedra, José Flores, que, "con moita brevidade", negocie cos representantes das centrais a implantación dun plan de choque co que reverter a situación de "precaridade" e evitar así a folga.
Deste xeito, os representantes dos traballadores esixen que ese plan estea dotado dos recursos humanos e económicos necesarios co fin de "recuperar un persoal estable que garanta unha asistencia digna, eficiente e de calidade á poboación, e non á conta da supresión dos dereitos dos traballadores como vacacións, permisos ou días de libre disposición".
Nun comunicado, estes sindicados recoñecen que, coa saída do anterior xerente, José Ramón Gómez, e con chegada de José Flores á fronte da área, apreciouse "unha melloría" no que se refire á planificación e a xestión de persoal, pero advirten que non abandonarán a folla de ruta feita pública o pasado mes de xullo, na que se recollen as súas esixencias. Se non ven cumprida esta proposta, irán "irremediablemente" á folga, aseguran.
Tamén reclaman que o Sergas informe á poboación sobre a situación actual, as medidas que se van a adoptar para corrixir as carencias existentes na actualidade, así como que se recoñeza o labor profesional dos sanitarios nesta época de "penurias". "Non somos nós os responsables da deficitaria atención sanitaria que os cidadáns reciben nin por acción nin omisión", agregan.
Igualmente, requiren que se abran todas as camas pechadas de inmediato, "ata que non queden pacientes nos corredores de urxencias no hospital", mediante a adopción dun protocolo de funcionamento para estes supostos que sexa de obrigado cumprimento para directivos.
A denuncia inmediata do contrato do servizo de ambulancias e a convocatoria dun novo concurso público, coa dotación de vehículos e o persoal necesarios, que deberá ser negociada tamén cos representantes dos sindicatos, é outra das reivindicacións que consideran irrenunciable, como tamén o é o cesamento do resto do equipo directivo do anterior xerente.
