Chega á Coruña 'AI: More than human', unha exposición interactiva sobre intelixencia artificial

A montaxe da exposición sobre intelixencia artificial 'AI: More than human' comezou na Coruña, na sede de Afundación Obra Social de Abanca, tras verse en Europa unicamente nos países onde están situadas as entidades que crearon o proxecto: Reino Unido e Países Baixos.

Será a primeira vez que chegue a España, segundo explican desde Afundación, que remarcan, sobre a mostra, que se trata dun "proxecto inmersivo e interactivo creado polo Barbican Centre de Londres e coproducido polo Forum Groningen de Países Baixos que explora a relación entre as persoas e a intelixencia artificial".

Máis de 20 persoas dos equipos de Barbican e Afundación traballarán ata a súa inauguración o próximo 5 de setembro nunha montaxe que ocupará todo o edificio. A exposición é unha das grandes propostas da entidade de cara ao final de ano, "un proxecto internacional, innovador, multidisciplinar e orientado ao futuro".

TRASLADO

Sobre os elementos que conforman 'AI: More than human', explica que foron trasladados por mar desde o Guandong Science Center en China, onde estivo exposta anteriormente, en catro colectores que transportan 103 caixas de grandes dimensións. "Dezanove toneladas de equipos e instalacións que configuran este proxecto que representa un estudo sen precedentes dos avances tanto creativos como científicos da intelixencia artificial, así como da evolución da relación entre os seres humanos e a tecnoloxía", engade.

Previamente á súa chegada ao almacén central de Abanca, en Pocomaco, os colectores trasladáronse a Malaisia, atravesando a Canle de Suez ata a súa chegada ao porto portugués de Sines, para arribar, finalmente, a Vigo.

CONTIDO

A exposición, organizada na Coruña en colaboración con ILUX Visual Technologies, ofrece aos visitantes, mediante instalacións artísticas inmersivas, "a oportunidade de interactuar coas pezas expostas para, desta maneira, experimentar as posibilidades da intelixencia artificial de primeira man".

A mostra realiza un percorrido a través da historia da Intelixencia Artificial, desde as súas ancestrais orixes ancoradas na relixión sintoísta xaponesa ou no mito xudeu do Golem, pasando polos primeiros experimentos informáticos de Ada Lovelace e Charles Babbage ou os avances realizados durante a década de 1940 e ata a actualidade.

Para iso, reúne algúns dos proxectos de investigación actuais máis destacados, realizados por institucións como o Massachussets Institute of Technology (MIT), Sony Computer Science Laboratories, Google Research, o Departamento de Informática de Imperial College de Londres ou DeepMind Technologies, con instalacións artísticas que exploran as posibilidades creativas da IA nas súas obras, como o músico Kode9, ou o galardoado artista tecnolóxico Yoichi Ochiai entre outros.

O contido estará organizado en catro seccións: The Dream of AI, a historia das distintas civilizacións e a súa relación coa creación de vida artificial e Mind Machines, un percorrido histórico desde as primeiras máquinas calculadoras ata a actualidade. A elas, súmanse Data Worlds, na que se exporá a vertente ética da aplicación da IA e Endless Evolution, unha sección que explora o campo da vida artificial (A-life) e como aplicala á evolución humana.

Contido da exposición sobre Intelixencia Artificial que programa Afundación. AFUNDACIÓN | Fonte: Europa Press