Reclaman a oferta de vacantes de Atención Primaria a enfermeiras especialistas

A Asociación Galega de Enfermaría Familiar e Comunitaria (AGEFEC) reclama o recoñecemento da formación sanitaria especializada e solicita a reconversión das prazas de enfermeira de Atención Primaria a prazas de especialista en Enfermería Familiar e Comunitaria.

Dado o inminente remate do período de formación de residentes de Enfermaría Familiar e Comunitaria da promoción 2020‐2022, a Asociación expón que un total de 34 enfermeiras especialistas no Servizo Galego de Saúde rematarán a especialidade tras dous anos de formación. "Un número nada despreciable que, de non ofertar vacantes para especialistas, serán desviadas a outros servizos, desperdiciando, así, todo o invertido na súa formación", sinalan nun comunicado.

Segundo explican, teñen coñecemento de compañeiras que "están fóra de Galicia soamente por mor da praza que obtiveron na elección para optar a formación sanitaria especializada (FSE), para as que sería un aliciente para voltar a Galicia". Tamén informan da existencia de enfermeiras especialistas que non traballan en Galicia pola "escasa saída profesional das bolsas de Enfermería Familiar e Comunitaria", polo que "a creación de novas oportunidades neste campo sería un incentivo para voltar". Segundo os datos manexados pola asocisción, máis dun 22% do persoal de enfermaría formado en Galicia emigra a outras comunidades.

Deste xeito, e dado o actual "déficit" de enfermeiras, dende AGEFEC aseguran que "o feito de que se dispoña de profesionais motivadas e formadas para traballar nun campo en concreto diminuiría esta problemática", e lembran que unha boa asistencia dende a Atención Primaria diminúe as asistencias a urxencias hospitalarias innecesarias e o número de ingresos evitables. A asociación pon o foco igualmente en que o aumento de residentes en formación nas diferentes áreas (só na área de Santiago de Compostela e Barbanza duplicouse) fai salientar a "escaseza de profesionais especialistas coa estabilidade necesaria para titorizalos".

Ante esta situación, veñen de solicitar a reconversión do 100% das prazas de enfermeira de Atención Primaria procedentes de xubilacións a prazas de especialistas en Enfermería Familiar e Comunitaria, e a "oferta" de todas as vacantes de Atención Primaria a persoal de enfermaría especialista en Familiar e Comunitaria. 

"Reclamamos o recoñecemento da formación especializada, xa que estas enfermeiras foron formadas nos diferentes centros de saúde galegos durante dous anos para ofertar unha mellor atención a cidadanía e, desa forma, seguir a actual liña de mellora da Atención Primaria", explica a Asociación, que lembra, así mesmo, que esta formación supón un custo individual de "preto de 60000 euros por residente".