Por E.P. | SANTIAGO DE COMPOSTELA | 02/09/2022 | Actualizada ás 19:13
A Deputación da Coruña financiará actividades da Real Academia Galega e da Orquestra Sinfónica de Galicia en virtude de senllos convenios, segundo informa. O presidente do organismo provincial, Valentín González Formoso, e a alcaldesa da Coruña, Inés Rei, asinaron o convenio co Consorcio para a Promoción da Música da Coruña, co obxectivo de financiar o programa de actividades da Orquestra Sinfónica de Galicia (OSG) durante o ano 2022. No acto participou tamén o deputado de Cultura, Xurxo Couto.
O convenio supón unha achega de 1,5 millóns de euros, "que permitirá que as distintas agrupacións da Orquestra Sinfónica de Galicia sigan levando a súa música aos concellos da provincia a través dos diferentes concertos programados", sinala a Deputación.
Por outra banda, Formoso e o presidente da Real Academia Galega, Víctor F. Freixanes, así como o deputado de Cultura, Xurxo Couto, asinaron, na sede da institución provincial, o convenio polo que a institución provincial financia a programación cultural da entidade durante o ano 2022.
A Deputación realiza unha achega de 60.000 euros, un 80% do orzamento que a Real Academia inviste nas actividades da súa programación anual, "na que este ano adquire un especial protagonismo o estudo e traballo sobre a toponimia", apunta a institución provincial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.