Investigado un veciño de Padrón por un delito de malos tratos animais
Os axentes da Garda CIvil acudiron ao lugar e comprobaron que había tres cánidos en "evidente estado de abandono", así como a existencia dos cadáveres de dous caprinos.
Por Europa Press / Redacción | SANTIAGO DE COMPOSTELA | 04/09/2022 | Actualizada ás 13:47
A Garda Civil investiga a un veciño de Padrón como presunto autor dun delito de malos tratos animais tras atopar tres mastines da súa propiedade en condicións hixiénico-sanitarias desfavorables e dúas cabras mortas.
Segundo trasladou o Instituto Armado, a investigación iniciouse por mor dunha denuncia realizada polo servizo de recollida do Concello de Padrón ao Seprona na que alertaba das condicións nas que se atopaban estes animais.
Así, os axentes acudiron ao lugar e comprobaron que había tres cánidos en "evidente estado de abandono", así como a existencia dos cadáveres de dous caprinos. Ante o estado de "desnutrición extrema" que presentaban, a Garda Civil procedeu á intervención dos cans para a súa asistencia inmediata.
Unha vez asistidos polos servizos veterinarios, confirmaron a falta de alimento e auga potable para a súa manutención, así como a falta de custodia e vixilancia da saúde dos animais co grave risco que isto supuña para a vida e integridade física dos cánidos.
