O BNG pide baixar ao Villa de Pitanxo no canto de pagar unha maqueta para unha reconstrución
Por E.P. | SANTIAGO DE COMPOSTELA | 05/09/2022 | Actualizada ás 14:25
O BNG tacha de "preocupante" que o Goberno central "pretenda suplir a necesidade de baixar directamente" ao Villa de Pitanxo por unha reconstrución cunha réplica do pesqueiro para recrear o naufraxio ocorrido o pasado mes de febreiro a uns 450 quilómetros de Terranova (Canadá).
O Bloque rexistrou diferentes preguntas ao Goberno no Congreso nas que cuestiona "que razóns" levan ao Goberno a "seguir negando a baixada ao pecio" para a inspección e gravación cun robot do casco afundido.
Igualmente, a formación nacionalista pregunta se o Executivo central rectificará esta decisión, á vez que quere saber por que razón non se informou aos familiares da adxudicación deste contrato para a simulación das condicións do mar e do buque no marco da investigación.
Neste sentido, o deputado do BNG, Néstor Rego, considera que "segue sendo necesario" que se envíe un barco á zona do afundimento para inspeccionar o pecio, "o que podería facerse perfectamente cun robot, como se realizou xa con outros barcos afundidos". Igualmente, o Bloque critica "a falta de transparencia e comunicación" por parte do Ministerio de Transportes, posto que as familias dos tripulantes falecidos do 'Villa de Pitanxo' tachan de "decepcionante" esta opción de investigación.
