"Nena con globo", de Banksy, aparece en Verín

Banksy é a día de hoxe, posiblemente, o artista gráfico máis famoso do mundo. En parte pola súa implicación na arte urbana, en parte polas súas actuación iconoclastas en subastas de arte, o seu exemplo como artista responsable e con alto contido social ten dignificado o graffiti, elevándoo á categoría de arte. A súa crítica aos valores do capitalismo salvaxe, a súa alta sensibilidade social e o seu aparente desprendemento do valor do diñeiro fixeron o resto.

Aproveitando a popularidade deste artista gráfico anónimo, o Concello de Verín suma unha nova réplica da súa obra ao proxecto coñecido como “Verín, territorio Banksy” no que obras icónicas do prolífico autor son empregadas para decorar edificios degradados. Neste caso, a pintada escollida foi  "Nena con globo". Con finalidade pedagóxica e divulgativa, a selección de pintadas que se fai busca conformar un percorrido turístico dentro do casco urbano de Verín. A execución dos facsímiles das obras do autor internacional corren a cargo do artista local Alex Araújo.

Confiando en que este circuíto turístico dentro do casco urbano xere un atractivo máis para visitar Verín sinalan desde o concello que “sería un final espectacular que o propio Banksy rematase por interesarse na vila e deixase unha das súas obras en Verín”.