Traballadores de Ence convocan unha manifestación antes de que o Supremo decida sobre o futuro da planta de Lourizán

O comité de empresa da fábrica de Ence, o comité de oficinas centrais e representantes de empresas auxiliares, así como sectores loxístico e forestal, convocaron unha manifestación polas rúas de Pontevedra para o 30 de setembro, venres, ás 20,00 horas.

Esta mobilización, que esperan que sexa "masiva", producirase tres días antes de que o Tribunal Supremo se reúna para ditar sentenza sobre o primeiro do tres recursos de casación contra as sentenzas da Audiencia Nacional que declaraban a nulidade da prórroga da concesión de Pontevedra. Segundo informou a compañía no seu informe trimestral á Comisión Nacional do Mercado de Valores (CNMV), o alto tribunal reunirase o 4 de outubro.

"Con esta manifestación queremos pór latente diante da opinión pública e a clase política o noso desexo de seguir traballando en Ence Lourizán antes do fallo de Supremo que vai decidir o noso futuro", expresou o presidente do comité de empresa da fábrica de Ence, Manuel Rivas. "Levamos tres anos vivindo unha situación de abafo, incerteza e impotencia", apostilou.

A presidenta do comité de oficinas centrais, Ana Cedeira, engadiu que "ás portas dunha recesión económica, consideramos que pechar unha empresa responsable socialmente e rendible economicamente é unha irresponsabilidade que pon de manifesto a incompetencia da clase política".

Segundo Ana Cedeira, os políticos "participaron nun bochornoso linchamento á clase obreira traballadora". "Lonxe de buscar solucións racionais, dedicáronse a enganar e a enturbar con propostas irreais", lamenta. Esta portavoz asegurou que o persoal de Ence está nunha "situación límite", polo que mostra o "desexo de que o Tribunal Supremo poña sensatez e cordura en todo este proceso".

Nestes momentos, a fábrica de Lourizán leva case dous meses sen actividade desde que a compañía se viu obrigada a parar como consecuencia do baixo nivel do caudal do río Lérez debido á seca. Por este motivo, a dirección presentou un expediente de regulación temporal de emprego (ERTE) que afecta a unhas 60 persoas cada día.

"Cremos que en sete ou dez días poderemos estar a arrincar ou mesmo xa en marcha", apunta Rivas, algo que supoñen porque "o río está a recuperar o nivel coas últimas choivas", aínda que lembrou que a decisión depende de Augas de Galicia e da empresa, que aínda non anunciou nada "oficialmente".

Por último, Ana Cedeira lamentou que "os políticos con esa irresponsabilidade, esa incompetencia, esa insensatez, ese egoísmo polo seu interese político, sempre nos utilizaron", polo que lles pediu que "xa abonda" e que lles deixen seguir traballando en Lourizán.