A Xunta enfróntase ao Goberno central polas competencias de costas impulsando unha nova lei

O presidente da Xunta, Alfonso Rueda, anunciou o impulso dunha lei de ordenación do litoral coa que o Goberno galego pretende sortear a negativa a transferir o dominio público marítimo-terrestre a Galicia. O Executivo galego sostén que o Estatuto xa lle outorga a capacidade de xestión, para o que se apoia nun ditame do Consello Consultivo solicitado ad hoc ante esta problemática na que o Goberno de Pedro Sánchez chama a Galicia a modificar marco estatutario para incluílo expresamente.

Na comparecencia ante a prensa posterior á reunión semanal do seu Goberno, Alfonso Rueda informou da decisión do Executivo de "dar este paso adiante" co que, asegura, non pretende que se abra unha "conflitividade" xudicial co Goberno central, que en todo caso non podería suspender a lei ata que a aprobe o Parlamento de Galicia.

Agora abrirase un período dun mes para consulta pública, como é preceptivo, no cal o texto pode recibir achegas de todos os cidadáns. Posteriormente, o borrador débese someter a aprobación do Consello (aprobación do anteproxecto de lei), o cal se converte en proxecto lexislativo unha vez comece a súa tramitación parlamentaria. Só cando estea aprobado o texto poderá ser recorrido ante o Constitucional, pero previamente pódense abrir outras canles e, como insistiu Rueda, a Xunta ten "a man tendida" para levar a cabo este traspaso de competencias de forma bilateral.

A lexislación que propón o Goberno autonómico, que pretende dar solución a "proxectos estratéxicos" con inseguridade xurídica, terá unha perspectiva "económica, ambiental e social" e servirá para "concretar a franxa costeira" sobre a que Galicia "ten competencia", "establecer usos que pode albergar, identificar actividades estratéxicas e ordenar o desenvolvemento", xunto con "establecer criterios para novas concesións no litoral" e "simplificar trámites administrativos" para permisos de actividade no litoral.

Na súa intervención, o mandatario autonómico lamentou que o Goberno central non lle deu resposta ao informe do Consello Consultivo presentado e que avala, segundo insistiu o propio mandatario galego, a competencia de xestión do litoral para Galicia de forma implícita.

A CONFEDERACIÓN DE EMPRESARIOS VEA "XUSTA"

O sector mar-industria de Galicia, inmerso nunha rolda de contactos cos grupos parlamentarios e tamén cos executivos para tratar de frear os efectos "prexudiciais" da lei de costas para empresas situadas no litoral, ve "xusta" a norma coa que a Xunta busca sortear esta situación.

Así o destacou o presidente da confederación de empresarios de Galicia (CEG), Juan Vieites, ao termo dunha reunión co grupo parlamentario popular, e en representación do complexo mar-industria, desde cocederos ata confrarías, pasando polas conserveiras.

Pola súa banda, o portavoz do PP no Parlamento galego, Pedro Puy, sinalou o "novo camiño" que "abre" esta vía, á vez que valorou que é a opción "máis rápida e eficaz" para tratar de dar solucións ao sector. "Espero que nesta ocasión e pola transcendencia do tema a administración central sexa respectuosa co autogoberno", aseverou Puy, en alusión a unha eventual suspensión da norma, no momento no que chegue a ser aprobada, se é que segue adiante.

"XOGÁMONOS MOITÍSIMO"

Na súa quenda, en declaracións aos xornalistas, Vieites reiterou a "preocupación pola viabilidade das empresas" ante a actual lexislación estatal. Galicia "xógase moitísimo" e a lei de cambio climático, primeiro, e o regulamento da lei de costas, despois --o regulamento é do pasado 1 de agosto--, van "contra" o desenvolvemento da actividade nestas plantas, segundo Vieites. "Non se quere ver nada na liña de costa", recriminou o responsable da patronal galega.

Neste sentido, lamentou que "se prima o paisaxístico con respecto ás actividades produtivas" e apelou á reunión o día 20 coa Dirección Xeral de Costas en Madrid. "Esperamos que despois das reunións todos os grupos apoien e estean na mesma dirección", subliñou.

ROLDA DE CONTACTOS

O luns, a portavoz nacional do BNG, Ana Pontón, tras reunirse co sector, anunciou que o seu grupo presentará unha iniciativa lexislativa na Cámara galega para pedir ao Congreso a transferencia a Galicia da "ordenación e a xestión" da costa. Tras verse coas conselleiras do Mar e de Medio Ambiente o martes, que anunciaron un recurso contra o regulamento da lei de costas, os representantes das empresas solicitaron o apoio tamén do PSOE galego, cuxo portavoz parlamentario dixo que, neste conflito, "primeiro van ser os intereses de Galicia".