A Xunta reparte 3,6 millóns a 1.025 particulares para corrixir impactos paisaxísticos en Galicia
Por Europa Press / Redacción | SANTIAGO DE COMPOSTELA | 16/09/2022 | Actualizada ás 14:41
Un total de 1.025 particulares e 44 concellos son beneficiarios duns 3,6 millóns de euros correspondentes ás axudas da Xunta para corrección dos impactos paisaxísticos en 2022.
Diso informou o director do Instituto de Estudos do Territorio, Enrique Luís de Salvador, a preguntas do deputado do PPdeG Rubén Lorenzo Gómez na comisión de ordenación territorial do Parlamento.
O responsable deste ente concretou que os millóns consignados para as 1.025 familias sitúanse en 2,8, "un 133% máis" que en 2021, que enmarcou na "aposta polo hermosismo" do Goberno galego.
Os expedientes correspóndense con 261 concellos e sitúanse 333 na provincia da Coruña (cun importe de máis de 900.000 euros), 313 en Lugo (por uns 870.000 euros), 195 en Ourense (uns 500.000 euros) e 184 en Pontevedra (por outros 500.000 euros, aproximadamente).
De acordo cos cálculos do organismo autonómico, estes 2,8 millóns suporán unha "mobilización" de investimentos "por importe de máis de 6 millóns". Case o 40% das solicitudes tivo que ver co pintado e revestimento de fachadas, o 25% foi para renovación das mesmas, o 20% para terminar o exterior de cubertas, o 7,4% para peche de leiras e o 9,3% para arranxo de muros de pedra.
CONCELLOS
Outra orde de subvencións destinouse a municipios de menos de 20.000 habitantes e neste punto foron 44 os beneficiarios duns 800.000 euros: nove concellos da provincia da Coruña, 17 en Lugo, 15 en Ourense e tres en Pontevedra. O "mobilizado" neste caso, segundo os datos da Xunta, supera os 1,5 millóns.
Pola súa banda, o parlamentario popular Rubén Lorenzo Gómez celebrou a "boa acollida" destas axudas financiadas con "fondos propios".
