O alcalde de Ferrol afirma "non coñecer o que demandan" Ares, Fene e Mugardos tras unha denuncia colectiva

O alcalde de Ferrol, Ángel Mato (PSOE), rexeitou pronunciarse sobre a demanda interposta por tres concellos da zona, como son Ares, Fene e Mugardos, ao asegurar que "polo momento non coñezo en detalle o que reclaman estes concellos" e que "o único que sei é que hai un problema, desde hai tempo, por unha serie de fugas que están no termo municipal de Fene, pero teremos que analizar a que se refiren o tres concellos".

Así o manifestou na mañá deste venres, tras transcender a presentación dunha denuncia dos consistorios de Ares, Fene e Mugardos, ante o Xulgado do Contencioso Administrativo de Ferrol, reclamando a reparación da tubaxe de auga mediante a que estes concellos se abastecen desde Ferrol, xa que perde unha gran cantidade de auga, na zona da ponte das Pías, e que vai parar directamente á ría de Ferrol.

De todos os xeitos, Mato detallou que "este asunto xa se tratou en numerosas ocasións co tres concellos, onde presentamos distintas alternativas, tamén lle pedimos axuda a Augas de Galicia, por entender que é unha cuestión que vincula a tres concellos e neste asunto o municipio máis prexudicado por esa fuga é Ferrol, xa que é auga depurada e nin se cobra nin contabiliza a ningún concello", detallando que "aquí o que perde é Ferrol e a fuga está en Fene".