Por E.P. | SANTIAGO DE COMPOSTELA | 18/09/2022 | Actualizada ás 13:21
O presidente da Xunta de Galicia, Alfonso Rueda, realizará en outubro a súa primeira viaxe oficial como líder da Administración autonómica a Arxentina e Uruguai. O obxectivo, sinalan nun comunicado, será reforzar os lazos coa colectividade galega e estreitar as relacións con ambos os países.
Desenvolverase en concreto entre os días 13 e 17 de outubro. Durante a súa estancia, o titular do Goberno galego terá unha axenda marcada por encontros con representantes diplomáticos españois e con autoridades do máis alto nivel dos dous países. A viaxe servirá tamén, remarcan, para promocionar Galicia e o Camiño de Santiago, polo que se prevé que Rueda participe nalgunha das diferentes actividades que se desenvolverán.
Para avanzar na preparación desta viaxe, Alfonso Rueda leva a cabo unha serie de encontros de traballo con representantes destes países. O primeiro deles foi esta semana, co xefe de Goberno da Cidade Autónoma de Buenos Aires, Horacio Rodríguez Larreta, co que mantivo unha videoconferencia.
Nesta reunión profundaron no escenario económico e social de Arxentina e, máis en concreto, de Buenos Aires, así como de España e Galicia. Tamén a este respecto Rueda aproveitou para abordar a situación da colectividade galega residente no país, "xa que este será un asunto prioritario na primeira visita de Rueda aos dous territorios".
O presidente da Xunta tamén convidou a Rodríguez Larreta a visitar Galicia antes de que finalice este ano Santo Xacobeo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.