Absolven ao home acusado de estafar ao seu socio nun ximnasio de Santiago

A sección sexta da Audiencia Provincial da Coruña absolveu de todos os cargos a un compostelán acusado de estafa, apropiación indebida, administración desleal, falsidade documental e coaccións en relación ao negocio que mantiña con outro home, un ximnasio, en Santiago.

En concreto, a sala cre que non quedou probado que houbese intencionalidade de estafar ou causar prexuízo ao denunciante, o seu socio no negocio, e que este era coñecedor da situación económica na que se atopaba o home, así como as instalacións.

Fiscalía pedía para o acusado tres anos de prisión, argumentando que o acordo co seu socio para a creación dunha sociedade para xestionar un ximnasio fora unha tapadeira para conseguir o capital para pagar as obras do inmoble, nas que o denunciante investiu máis de 91.000 euros.

Con todo, o tribunal considera que non houbo ocultación de información nin intención de enganar, ou que esta, polo menos, non quedou probada, e que o demandante "antes de entrar no negocio e constituír a sociedade, tivo á súa disposición o local e viu o seu estado". "Que o negocio se frustrou é evidente, como tamén que o denunciante, segundo consta no documento referido, asumiu maiores cantidades que o denunciado", recolle a sentenza.

"De ser así, a solución non é un proceso penal por estafa ou apropiación indebida, porque falla a premisa da argumentación, ao aceptar o denunciante a valoración efectuada polo seu socio, con carácter previo a constituír a sociedade, mostrándolle o denunciado todo o traballo executado ata a data e a valoración efectuada. AAA viu o que estaba executado e en canto se valoraba, aceptándoo e decidindo constituír a sociedade, sen que demostrase a existencia de ningún engano revelador dun ilícito penal", conclúe.

Audiencia Provincial da Coruña.